لە ماوەی دوو ڕۆژدا زیاتر لە 100 کەس لە نێوان هەسەدە و گرووپە چەکدارەکانی نزیک لە تورکیا کوژران

ئاڤا نیوز 

 

شەڕ و پێکدادانەکانی نێوان گرووپە چەکدارەکانی نزیک لە تورکیا هێزەکانی سوریای دیموکرات (هەسەدە) لە لادێکانی باکوری سوریا لە مەنبەج بەردەوامن و تاوەکو ئێستا زیاتر لە 100 کەس کوژراون.

 

وێنە گەورەکە: دوای ڕووخانی دەسەڵاتەکەی بەشار ئەسەد لە سووریا گرتنە دەستی دەسەڵات لەلایەن دەستەی تەحریرولشام، تورکیا و  گرووپە چەکدارەکانی نزیک لە تورکیا، بەردەوام هێرش دەکەنە سەر هێزەکانی هەسەدە لە مەنبەج و بەنداوی تشرین و پێکدادانی قورس لە نێوانیان دا بەردەوامە.

 

ڕاگەیێنراوی فەرمی: ڕوانگەی سووری بۆ مافەکانی مرۆڤ ڕایگەیاند: لە ماوەی دوو ڕۆژدا تا بەرەبەیانی ئەمڕۆ یەکشەممە، ژمارەی کوژراوانی هەردوولا گەیشتووەتە 101، کەس کە بەم شێوەیە دابەشبوون: 85 گرووپە چەکدارەکانی نزیک لە تورکیا ، و 16 لە هێزەکانی هەسەدەن.

 

لە لایەکی دیکەوە: ڕامی عەبدولڕەحمان، بەڕێوەبەری ڕوانگەی سووری بە ئاژانسی فرانس پرێسی ڕاگەیاند، "شەڕ و پێکدادانەکان لە گوندەکانی باشوور و باشووری ڕۆژهەڵاتی مەنبەج توندتر بوون و دوای نێوەندگیری دەکات".

 

باکگراوند: سەرەڕای ڕاگەیاندنی ئاگربەست بە نێوەندگیری ئەمریکا، بەڵام هەر لەو کاتەوە، شەڕ و پێکدادانەکانی نێوان هێزەکانی هەسەدە و گرووپە چەکدارەکانی نزیک لە تورکیا لە لادێکانی مەنبەج و دەوروبەری بەنداوی تشرین بەردەوامە.