میدیا عێراقییەکان: ئیسماعیل قائانی بە نهێنی لە عێراقە

ئاڤا نیوز

فەرماندەی فەیلەقی سوپای پاسدارانی ئێران دوو ڕۆژ پێش سەدانەکەی سوودانی بۆ تاران بە سەردانێکی نهێنی گەیشتە بەغدا و لە میانی سەردانەکەشیدا لەگەڵ ژمارەیەک لە سەرکردەی گرووپە چەکدارەکان کۆبووەوە.

 

وێنە گەورەکە: بڕیارە ڕۆژی چوارشەممە سەرۆکوەزیرانی عێراق سەردانی ئێران بکات و لەگەڵ بەرپرسانی باڵای ئەو وڵاتە چەندین دۆسیە تاوتوێ بکات، یەکێک لەو دۆسیانەش گەیاندنی ئەو پەیامە هۆشدارییە تووندەیە بە تاران کە لەم دواییانەدا لەلایەن ئەمریکاوە بە عێراق دراوە سەبارەت بە سنووردارکردنی چەک لە دەست گرووپە چەکدارەکان.

 

زانیاریی بەدەستهاتوو: سەرچاوەیەکی ئاگادار کە قسەی بۆ میدیای عێراق کردووە، ئاماژە بە گەیشتنی ئیسماعیل قائانی، فەرماندەی فەیلەقی سوپای پاسدارانی ئێران دەکات بۆ بەغدا کە بە سەردانێکی نهێنی هاتووە. لە میانی سەردانەکەشدا لەگەڵ ژمارەیەک لە سەرکردەی گرووپە چەکدارەکان بە جیا کۆبووەتەوە.

 

زانیاریی زیاتر: بە گوتەی ئەو سەرچاوەیە، بڕیارە دوای ئەو کۆبوونەوانە، قائانی کۆبوونەوەیەکی فراوان لەگەڵ محەممەد شیاع سوودانی، فەرماندەی گشتی هێزە چەکدارەکان و هێزەکانی چوارچێوەی هەماهەنگی و سەرۆکی دەستەی حەشدی شەعبی بکات.

 

هۆکارە زانراوەکان: قائانی لە میانی دیدارەکانیدا لەگەڵ بەرپرسانی عێراق، کۆمەڵێک دۆسیە تاوتوێ دەکات، لەوانەش داڕشتنەوەی پێکهاتەی گرووپە چەکدارەکان و بەیاساییکردنی چەکی ئەو گرووپانە و لێکهەڵوەشاندنەوەی هەندێکیان و ڕەنگە ڕێگا و میکانیزم بگیرێتەبەر بۆ گۆڕینی هەندێک لەم گرووپانە بۆ ناو هێز یان بەرەی سیاسی.