کۆمیسیۆن هەنگاوەکانی یەکلاکردنەوەی کاندیدە دەرچووەکان ئاشکرا دەکات

ئاڤا نیوز

کۆمسیۆنی هەڵبژاردنەکان بە وردی میکانیزمی یەکلاکردنەوەی سکاڵا و تانەکانی پێش پەسەندکردنی لیستی کۆتایی براوەکان و یەکلاکردنەوەی ئەو 329 ئەندامەی پەرلەمان دەخاتەڕوو.

وێنە گەورەکە: لە 11ی ئەم مانگە، هەڵبژاردنی پەرلەمانی عێراق بەڕێوەچوو و دوای ئەوە بە 24 کاتژمێر، کۆمیسیۆنی هەڵبژاردنەکان ئەنجامیی بەرایی بڵاوکردەوە، چەند هەنگاوێک ماوە بۆ دیاریکردنیی ناوی کاندیدە دەرچووەکان و پەسەندکردنیان.

لێدوانی فەرمی: نیبراس ئەبو سۆدە، یاریدەدەری وتەبێژی کۆمیسیۆنی باڵای سەربەخۆی هەڵبژاردنەکان ئاشکرای کردووە، پێش ئەوەی ئەنجامە کۆتاییەکان ڕابگەیێنرێت، پرۆسەی تەرخانکردنی کورسی و دیاریکردنی ناوی براوەکان بە چەند قۆناغێک تێدەپەڕێت.

ناوبراو وتیشی: "سەرەتا کۆمیسیۆن کاردەکات بۆ یەکلاکردنەوەی سکاڵا پێشکەشکراوەکان، جگە لە چارەسەرکردنی کێشەکانی ئەو بنکانەی دەنگدان کە لە ماوەی شەش کاتژمێری یەکەمی دوای داخستنی سندووقەکانی دەنگدان ئەنجامەکانیان نەگواستەوە، کە بڕیاربوو لە ڕێگەی ناوەندی گەیاندن بگاتە دەست کۆمیسیۆن".

زانیاریی زیاتر: بەگوتەی سۆدە، دەتوانرێت تانە لە ئەنجامە سەرەتاییە ڕاگەیێندراوەکان بدرێت لەلایەن لیست و کاندیدەکان، دواتر لەلایەن کۆمیسیۆن و دەستەی دادوەریی هەڵبژاردن یەکلایی دەکرێنەوە، ئینجا دواتر دەستەی دادوەری یەکلاییکردنەوەی تەواوی هەموو تانەکان ڕادەگەیێنێت لە  کۆتاییدا پرۆسەی تانەدان و یەکلاکردنەوەی بە فەرمی تەواو دەبێت.

دوای ئەم هەموو هەنگاوانە، کۆمیسیۆن ئەنجامە کۆتاییەکان بە ناوی کاندیدە دەرچووەکانەوە بۆ دادگای باڵای فیدراڵی دەنێرێت بۆ ئەوەی پەسەندی بکات.

ئەوەی پێویستە بیزانیت: ئەو ڕێکارانە پەیوەست نین بە ماوەیەکی دیاریکراوەوە بەڵکو تا کۆتایی هاتنی هەموو هەنگاوەکان درێژە دەکێشێت.