لە میسان لەسەر کێشەی زەویوزار سێ ڕۆژە شەڕە و 13 کوژراون

ئاڤا نیوز

لە ئەنجامی شەڕی خێڵەکی لەسەر زەویوزار لە قەزای عەلی غەربی لە پارێزگای میسان، 13 کەس کوژراون و ژمارەیەک  کەسی دیکەش بریندار بوون.

 

وێنە گەورەکە: بەهۆی بوونی کێشەی کۆمەڵایەتی و داگیرکاریی زەویوزار، دیاردەی شەڕی خێڵەکی لە باشووری عێراق بەردەوامی هەیە، لە سەرەتای ئەمساڵەوە تاوەكو ئێستا چەندین شەڕی خێڵەكی لە باشووری عێڕاق ڕوویانداوە.

 

زانیاریی بەدەستهاتوو: شایەتحاڵان و سەرچاوە پزیشکییەکان کە قسەیان بۆ ئاڤا میدیا کردووە ڕایدەگەیێنن، شەڕەکە لەنێوان هەردوو هۆزی "ئەلمعامرە" و "ڕوفەیعی"دا ڕوویداوە. هۆکارەکەشی کێشەیەک بووە لەسەر پارچە زەوییەکی کشتوکاڵی، کە بووەتە هۆی کوژرانی 13کەس و برینداربوونی ژمارەیەک کەسی دیکە.

 

بەپێی سەرچاوە پزیشکییەکان، ژمارەی کوژراوەکان سەرەتاییە و ئەگەری زیادبوونی هەیە چونکە هەندێک لە بریندارەکان دۆخیان ناجێگیرە.

 

لەهەمان کاتدا: هێزێکی ئەمنیی گەورە بەرەو شوێنی ڕووداوەکە بەڕێکەوتوون بۆ کۆنترۆڵکردنی شەڕەکە، کە تا کاتژمێر نزیک 1ی نیوەڕی ئەمڕۆ شەممە بەردەوام بوو.