پارتی و یەكێتی لەبارەی کارنامەی هاوبەشی کابینەی حکومەت کۆدەبنەوە

ئاڤا نیوز

سبەی پارتی و یەكێتی لە هەولێر كۆدەبنەوە و گفتوگۆ لەبارەی خێراكردنی هەنگاوەكانی پێكهێنانی كابینەی دەیەمی حكومەتی هەرێمی كوردستان دەكەن.

 

وێنە گەورەكە: لەدوای هەڵبژاردنی خولی شەشەمی پەرلەمانی كوردستان، پارتی و یەكێتی وەك براوەی یەكەم و دووەمی هەڵبژاردنەكە دووجار كۆبوونەتەوە و سبەی سێشەممە 7-1-2025 لە كۆشكی مەكتەبی سیاسیی یەكێتی نیشتمانی كوردستان لە هەولێر بۆ جاری سێیەم كۆدەبنەوە.

 

زانیاریی بەدەستهاتوو: شاندی پارتی بە سەرۆكایەتیی د. پشتیوان سادق، ئەندامی مەكتەبی سیاسی و بە ئەندامێتی دڵشاد شەهاب سەردانی یەكێتی دەكەن و لەلایەن شاندێكی یەكێتی بە سەرۆكایەتیی ڕێواس فایەق، ئەندامی مەكتەبی سیاسیی یەكێتی و بە ئەندامێتی ئامانج ڕەحیم پێشوازی دەكرێن.

 

ئەوەی پێویستە بیزانیت: هەردوو شاندی پارتی و یەكێتی لە سێیەم كۆبوونەوەی نێوانیاندا، بەرنامەیەكی هاوبەش بۆ پێكهێنانی كابینەی نوێی حكومەتی هەرێمی كوردستان ئامادە دەكەن.

 

باكگراوند: دوای هەڵبژاردنی 20ـی تشرینی یەكەمی 2024، پارتی و یەكێتی دووجار كۆبوونەتەوە؛ جاری یەكەم لە سەرەتای مانگی كانوونی یەكەمی ساڵی ڕابردوو لە سلێمانی كۆبوونەوە، جاری دووەم لە 17-12-2024 لە پیرمام بەڕێوەچوو كە ئەو كات بڕیاردرا دوای سەری ساڵ كۆبوونەوەیەكی دیكە بكرێت.