فایلی خەڵک، بەدواداچوون بۆ کێشەی ژمارەیەک خاوەن ئۆتۆمبێل

ئاڤا نیوز

لە هەرێمی کوردستان نزیکەی 10 هەزار ئۆتۆمبێل بە بیانووی ئەوەی بڕاوەن، تۆمار ناکرێن و تابلۆیان پێ نادرێت.

 

وێنە گەورەکە: نزیکەی 10 هەزار ئۆتۆمبێل سەرەڕای ئەوەی مۆدێلیان بەرزە و بە شێوەیەکی یاسایی لە ڕێگەی دەروازە سنوورییەکانەوە داخڵی هەرێمی کوردستان کراون، بەڵام لە پشکنین دەرکەوتووە کە بەشێکیان بڕاوەن و بەشێکی دیکەشیان ڕێژەی لێدراویان زۆرە، ئێستا مامەڵەی تۆمارکردنیان وەستێنراوە. بەشێک لەو خاوەن ئۆتۆمبێلانە هانایان بۆ ئاڤا هێناوە بە مەبەستی چارەسەرکردنی ئەو گرفتەیان.

 

لێدوانی فەرمی: یەکێک لەو خاوەن ئۆتۆمبێلانە بە ئاڤا میدیای ڕاگەیاند:

- ئۆتۆمبێلەکان مۆدێل 2022، 2023 و 2024ـن، هەرچەندە سەرجەمیان پشکنینیان بۆ کراوە و مۆڵەت و ڕێگەپێدانی گومگریان هەیە لەگەڵ مەنەفێست، بەڵام بەبیانووی ئەوەی لێدرانیان هەیە، بە بڕاوە هەژمارکراون و ڕەقەم ناکرێن.

- بە ڕەقەمکردنی ئۆتۆمبێلەكانیان، هەم ئەوان قازانج دەکەن هەمیش حکومەت ڕسوماتی تۆمارکردنی وەردەگرێت کە بۆ هەر ئۆتۆمبێلێک سەرووی هەزار دۆلارە.

- پاڵپشت بە بڕیاری وەزارەتی ناوخۆ ئەو ئۆتۆمبێلانەی بە بڕاوە هەژمارکراون تۆمارناکرێن، ئەگەرچی مەنەفێستیان هەیە و بۆ لێخوڕین لە سەرتاسەری هەرێمی کوردستان هیچ گرفتێکیان نییە.

زانیاریی زیاتر: بەهۆی ئەوەی ئەو ئۆتۆمبێلانە تۆمارناکرێن نرخیان بەراورد بە ئۆتۆمبێلی دیکەی هەمان جۆر و مۆدێل، چوار هەزار تاوەکو پێنج هەزار دۆلار کەمترە و بەهۆی هەرزانی نرخەکانیان بازاڕیان لە پێشانگەکانی کڕین و فرۆشتنی ئۆتۆمبێل گەرمە.

لەلایەکی دیکەوە: لیوا دیدار عومەر، بەڕێوەبەری گشتیی هاتووچۆی هەرێمی كوردستان بە ئاڤا میدیای ڕاگەیاند: هەر ئۆتۆمبێلێک بڕاوە بێت بەهیچ جۆرێک ڕێگە نادرێت بە ڕێگای یاسایی داخڵی هەرێمی کوردستان بکرێت، ئەگەر بە ڕێگای نایاسایی داخڵ کرابن، تەنانەت مەنەفێستیشیان هەبێت و پشکنینیان بۆ کرابێت، ئەگەر دەرکەوت بڕاوە بن تۆمار ناکرێن، ئەو 10 هەزار ئۆتۆمبێلەی تۆماریش نەکراون لەم جۆرەن، واتە بڕاوەن.