ماتیۆ میلەر لەبارەی ڕۆژئاوای کوردستان بۆ ئاڤا: لەگەڵ تورکیا لەسەر خەتین

ئاڤا نیوز

 

وەزارەتی دەرەوەی ئەمریکا لە نوێترین لێدوانی بۆ ئاڤا میدیا ڕایدەگەیەنێت، لەنزیکەوە چاودێری دۆخی سووریا و ڕۆژئاوای کوردستان دەکەین و لەگەڵ تورکیا و لایەنەکانی دیکەش لەسەر خەتین بۆ کەمکردنەوەی گرژیی و ئاڵۆزییەکان.

 

وێنە گەورەکە: هێرشی گرووپە چەکدارەکانی نزیک لە تورکیا بۆ سەر ڕۆژئاوای کوردستان بەردەوامە و تورکیاش بەردەوام  هەڕەشە لە هێزەکانی سووریای دیموکرات (هەسەدە) دەکات. ئەمریکاش لەوبارەیەوە لەسەر خەتە و داوا دەکات هەسەدە و گرووپە چەکدارەکان دان بەخۆیان بگرن و گرژییەکان کەمبکەنەوە.

 

لێدوانی فەرمی: ماتیۆ میلەر، وتەبێژی وەزارەتی دەرەوەی ئەمریکا بە ئاڤا میدیای ڕاگەیاند:

 

- لە نزیکەوە چاودێریی پێشهاتەکانی باکووری ڕۆژهەڵاتی سووریا دەکەین، داوا لە هەسەدە و گرووپە چەکدارەکان دەکەین گرژییەکان کەمبکەنەوە.

 

- ئەرکی هەموو ئەو وڵاتانەیە کە لە ناوچەکەدا کاریگەرییان هەیە، لەنێویاندا تورکیا، پێویستە کار بکەن بۆ سەقامگیری و خۆبەدوورگرتن لە پەرەسەندنی گرژییەکان.

 

- سەرنجمان لەسەر پێشخستنی پرۆسەیەکی سیاسی گشتگیرە بە سەرکردایەتی سوورییەکان، ئەرکی ئەمریکا نییە  هەڵیبژێرێت کێ و چ لایەنێک لەسەر مێزی گفتوگۆکان بێت، چونکە ئەو پڕۆسەیە دەبێ سوورییەکان خاوەنیبن، بەڵام سووریا وڵاتێکی هەمەچەشنە، دەرکردنی ژنان و لایەنە گرنگەکانی دیکە لە گفتوگۆکان، مەترسی ناسەقامگیری زیاتر دەکات.

 

لەلایەکی دیکەوە: هەر ئەمڕۆ لەبارەی عێراق، ماتۆمیلەر بە ئاڤای گوت: بە ڕاشکاوی داوایان لە حکومەتی عێراق کردووە گرووپە چەکدارەکان کۆنترۆڵ بکات.