سەرۆکوەزیران مەسرور بارزانی سەردانی تورکیا دەکات

ئاڤا نیوز

 

سەرۆکوەزیران مەسرور بارزانی، بۆ تاوتوێکردنی چەند پرسێکی گرنگ دەچێتە ئەنقەرەی پایتەختی تورکیا و لەگەڵ سەرۆککۆماری ئەو وڵاتە کۆدەبێتەوە. 

 

وێنە گەورەکە: بڕیارە ئەمڕۆ سێشەممە سەرۆکوەزیران مەسرور بارزانی، بە سەردانێکی فەرمی بگاتە وڵاتی تورکیا و لەگەڵ بەرپرسانی ئەو وڵاتە چەندین پرسی گرنگ تاوتوێ بکات. 

 

زانیاریی زیاتر: بڕیارە پێش نیوەڕۆی ئەمڕۆ سەرۆکوەزیران لەگەڵ گەیشتنی بە ئەنقەرە چاوی بە هاکان فیدان، وەزیری دەرەوەی تورکیا بکەوێت، هاوکات دوای نیوەڕۆش لەگەڵ ڕەجەب تەیب ئەردۆغان، سەرۆککۆماری تورکیا کۆدەبێتەوە. 

 

ئەوەی پێویستە بیزانیت: ئاڤا زانیویەتی کە سەرۆکوەزیران بارزانی لەگەڵ بەرپرسانی تورکیا چەندین پرسی گرنگ تاوتوێ دەکات لەوانە:- پەیوەندییە سیاسی و ئابوورییەکانی هەرێمی کوردستان و تورکیا، هەروەها پرسی دووبارە دەستکردنەوە بە هەناردەی نەوتی هەرێمی کوردستانیش لە ڕێگەی بەندەری جیهانەوە یەكێک دەبێت لە تەوەری گفتوگۆکان.

 

لەلایەکی دیکەوە: چەند رۆژی ڕابردوو، مەزڵووم عەبدی فەرماندەی هێزەکانی سووریای دیموکرات، داوای لە بەرپرسانی باڵای هەرێمی کوردستان کردبوو کە هاوکاریان بن لە چارەسەرکردنی کێشەی کورد لە سووریای نوێدا و پاراستنی رۆژئاوای کوردستان، سەرۆکوەزیرانی هەرێمی کوردستانیش دەیەوێت ئەو پرسە لەگەڵ بەرپرسانی تورکیا بەوردی تاوتوێ بکات.