لە خۆپیشاندانی خاوەن ئۆتۆمبێلە بێ سەرەتاکان گرژیی و ئاڵۆزی دروست بوو

ئاڤا نیوز

 

دەستبەسەرداگرتنی ئۆتۆمبێلە بێ سەرەتاکان لە پارێزگای سلێمانی، ناڕەزایەتیی هاونیشتمانیانی لێ کەوتووەتەوە و لەبەردەم شەقامی باڵەخانەی پارێزگاری سلێمانی خۆپیشاندانی خاوەن ئۆتۆمبێلە بێ سەرەتاکان بەڕێوەچوو. 

 

وێنە گەورەکە: زیاتر لە دوو مانگە لە سنووری سلێمانی لەلایەن مەفرەزەکانی پۆلیسی هاتووچۆ و ئاسایشەوە ئۆتۆمبێلی مەلیکە و بێ سەرەتاکان دەستیان بەسەردا دەگیرێت، هاوکات لە بازگەکانی سلێمانی ڕێگە بەو ئۆتۆمبێلانە نادرێت بێنە نێو سلێمانیەوە، ئەمەش نیگەرانی لای خاوەنی ئەو ئۆتۆمبێلانە درووستکردووە و نرخیشی لە پێشانگەکان دابەزیوە.

 

لێدوانی فەرمی: سەرکار ساماڵ، خاوەنی ئۆتۆمبێلی مەلیکەیە و بەشداریی لە خۆپێشاندانەکەی سلێمانیدا کردووە، بە ژیوار عەبدولرەحمان، پەیامنێری ئاڤا میدیای ڕاگەیاند: ئۆتۆمبێلەکانمان لە ماڵەوە ڕاگرتووە و ناتوانین دەریبێنین، بۆیە پێویستیمان بە چارەسەری هەیە و داوا دەکەین لەڕێگەی لیژنەیەکەوە لێکۆڵینەوە بۆ توندوتۆڵی ئۆتۆمبێلەکان بکەن، بەهۆی ئەم هەڵمەتەی ئاسایش و پۆلیسی هاتووچۆی سلێمانیەوە کەس ئۆتۆمبێلەکانمان لێ ناکڕێت و زیانێکی زۆر دەکەین.

 

ئەوەی پێویستە بیزانیت: تاوەکو ئێستا زیاتر لە 60 ئۆتۆمبێلی مەلیکە و بێ سەرەتا لە سنووری سلێمانی دەستیان بەسەردا گیراوە و خاوەنەکانیان ئۆتۆمبێلەکانیان لەنێو حەوشە و بەردەرگای ماڵەکانیان ڕاگرتووە و ناتوانن بیجوڵێنن.

 

نوێدەکرێتەوە...