سێ یەكەمەكانی زانكۆ و پەیمانگەكان داوای دامەزراندن دەكەن

ئاڤا نیوز

 

نوێنەری سێ یەکەمەکانی زانکۆ پەیمانگاکان لە هەولێر گردبوونەوە و داوای دامەزراندنیان کرد، سەرچاوەیەکی باڵاش لە حکومەتی هەرێمی کوردستان ڕایگەیاند، بەدواداچوونی ڕژد دەکەین بۆ ئەو بابەتە. 

وێنە گەورەکە: نزیكەی 15 ساڵە دامەزراندن لە هەرێمی كوردستان وەستاوە، بەڵام تاوەكو چەند ساڵێك دواتریش هاوشێوەی پزیشكان، سێ یەكەمەكانی زانكۆ و پەیمانگەكانیش دادەمەزران، پاشان ئەوەش نەما بە گشتی سێ یەكەمەكانی هەشت ساڵی دەرچوون دانەمەزراون.

 

ئەوەی پێویستە بیزانیت: ئەمڕۆ سێشەممە سێ یەکەمی زانکۆ و پەیمانگاکان لەبەردەم ئەنجوومەنی وەزیران گردبوونەوە و داواکارییەکانی خۆیان گەیاند بە حکومەت. ئەم گردبوونەوەیە ٤١ەمین خۆپێشاندان و گردبوونەوەی ئەو دەرچووانەیە کە تاوەكو ئێستا وەڵامێكی ڕوونیان وەرنەگرتووە.

لێدوانی فەرمی: سەرچاوەیەك لە وەزارەتی خوێندنی باڵا و توێژینەوەی زانستی بە ئاڤای ڕاگەیاند، وەزارەتەكە بە ئەركی خۆی هەڵساوە و بە نووسراوی فەرمی لە رێككەوتی 22-8-2024، ناوی سێ یەكەمەكانی بە لیست بۆ دیوانی سەرۆكایەتیی ئەنجوومەنی وەزیران ناردووە.

 

ئەوەشی خستەڕوو کە ئەو سێ یەكەمانە بایۆمەتریشیان كردووە واتا قۆناغێك چوونەتە پێش، ئەركەكە كەوتووەتە ئەستۆی هەردوو وەزارەتەکانی دارایی  کوردستان و عێراق، بۆ ئەوەی بڕی پارەی پێویستیان بۆ تەرخان بكرێت لەپێناو ئەوەی بە شێوەی گرێبەست دابمەزرێن.

قووڵتر: ئاڤا بەدواداچوونی زیاتری كرد و بەپێی گوتەی سەرچاوەیەك لە ئەنجوومەنی وەزیران، بابەتەكە بە ڕژدی كاری لەسەر كراوە و لە گفتوگۆكانی نێوان شاندی دارایی هەولێر و بەغداش باس كراوە، ئێستا تەنیا ڕەزامەندیی وەزارەتی دارایی عێراقی ماوە، دەبێت ڕەزامەندیی خەرجكردنی مووچەكانیان بدرێت پاشان فەرمانی دامەزراندنیان بۆ دەردەچێت.