ئەنجوومەنی وەزیرانی کوردستان لەسەر سێ تەوەری تایبەت بە مووچە و بوودجە کۆدەبێتەوە

ئاڤا نیوز 

 

ئەنجوومەنی وەزیرانی هەرێمی کوردستان یەکەم کۆبوونەوەی لە ساڵی 2025 دەکات و تایبەت دەبێت بە مووچە و بودجە و پرسە داراییەکان. 

وێنە گەورەکە: کۆبوونەوەکە ئەمڕۆ دوای سەردانەکەی  سەرۆکوەزیران مەسرور بازرانی بۆ تورکیا دەکرێت و خۆی سەرپەرشتی دەکات.

 

لە کۆبوونەوەکەدا سێ تەوەری سەرەکی تاوتوێ دەکرێت ئەمانیش:- 

 

- تەوەری یەکەم: بەرەپێشچوونەكانی پرۆژەی بەئەلیكترۆنیكردنی ناوەندیی خشتەی مووچەی مووچەخۆرانی هەرێم (پرۆژەی سیستەمی پەیرۆڵ)، بە گوێرەی بڕیاری پێشووی ئەنجوومەنی وەزیران تاوتوێ دەكرێت.

 

- تەوەری دووەم: ڕاپۆرتێك سەبارەت بە بارودۆخی دارایی ساڵی 2024 لەبەر ڕۆشناییی دواڕوونكردنەوەی وەزارەتی دارایی و ئابووریی هەرێمی كوردستان بەپێی تەرازووی پێداچوونەوەی مانگانە و خشتەكانی تەرخانكراویی هەرێم لە بودجەی فیدراڵ دەخرێتە ڕوو.

- تەوەری سێیەم: ڕاپۆرتێك سەبارەت بە پشتبەستنی ژمارەی كەسیی بێهاوتا (UPN) و ئەنجامی پرۆسەی تۆماری بایۆمەتریی مووچەخۆرانی هەرێم لەلایەن وەزارەتی پلاندانان دەخرێتە ڕوو.

 

لێدوانی فەرمی: پێشەوا هەورامانی، وتەبێژی حکومەت لەبارەی کۆبوونەوەکە بە ئاڤا نیوزی ڕاگەیاند، وێڕای ڕاپۆرتەکە، بابەتی بایۆمەتری و ناردنی زانیارییە داواکراوەکان بۆ حکومەتی عێراق و پڕۆژەی بە ئەلیکترۆنیکردنی سیستەمی ئامادەکردنی لیستی موچەخۆران گفتوگۆیان لەسەر دەکرێت.

ئەوەی پێویستە بیزانیت: هەرێمی کوردستان بەهۆی بەردەوامی کێشە هەڵپەسێردراوەکانی لەگەڵ عێراق، سەرباری چەندین ڕێککەوتن و جێبەجێکردن و پابەندبوونیان پێوەی، بەڵام بە درێژایی ساڵی ڕابردوو لەکاتی خۆیدا و بە تەواوی پارەی مووچەی بەدەست نەگەیشت، بەهۆیەوە هەندێک مانگ دابەشکردنی مووچە دواکەوت، تاوەکو ئێستاش چارەنووسی مووچەی مانگی ١٢ دیارنییە.