پەیامێکی نوێ لە سەرۆک بارزانییەوە بۆ ڕۆژئاوای کوردستان: یەکڕیز و یەکهەڵوێست بن

ئاڤا نیوز 

سەرۆک بارزانی لە نوێترین پەیامیدا پشتیوانی دۆزی کورد لە سووریا دەکات، داواش دەکالایەنە کوردییەکانی ڕۆژئاوای کوردستان یەکڕیزی و یەکهەڵوێست بن.

چیرۆکی سەرەکی: ئەمڕۆ لە سەڵاحەددین، سەرۆک مەسعود بارزانی لەگەڵ شاندێکی ئەنجوومەنی نیشتمانیی کورد لە سووریا (ئەنەکەسە) کۆبووەوە و ئایندەی پرسی کوردیان لە ڕۆژئاوای کوردستان تاوتوێ کرد.

ڕاگەیەنراوی فەرمی: بەپێی ڕاگەیێنراوێکی بارەگای بارزانی، لە کۆبوونەوەکەدا بیروڕا لەبارەی بارودۆخ و دوایین پێشهات و گۆڕانکارییەکانی سووریا و هەڵوێستی لایەنە کوردییەکان لەمەڕ گۆڕانکارییە هەنووکەییەکان ئاڵوگۆڕ کراوە.

 

سەرۆک بارزانی  جەختی لە پشتیوانیکردنی دۆزی گەلی کورد لە سووریا کردووەتەوە، یەکڕیزیی و یەکهەڵویستیی لایەنە کوردییەکان بەپێویست زانیوە بە ڕەچاوکردنی بەرژەوەندییەکانی گەلی کورد لە سووریا و پشتبەستن بە دیالۆگ و ڕێکاری ئاشتیانە.

باکگراوند: دوو لایەنی سەرەکی لە ڕۆژئاوای کوردستان هەن، ئەنەکەسە لە 12 گرووپ و ڕێکخراو پێکدێت، لەگەڵ هەسەدە کە 24 گرووپ و ڕێکخراو لەخۆدەگرێت. دوای ڕووخانی حکومەتی بەشارد ئەسەد گرنگترین پرس بەلای کورد پاراستنی قەوارەی ڕۆژئاوای کوردستان و زامنکردنی مافەکانی کوردە لە دەستووری نوێی سووریا.

لەو پێناوەدا هەوڵەکان چڕکراونەتەوە، بە هەوڵەکانی بەرپرسانی باڵای کورد و چاودێریی ئەمریکا، مانگی ڕابردوو هەردوولا کۆبوونەوەیەکیان کرد، بڕیارە کۆبوونەوەی دیکەش بکەن بۆ یەکخستنی داواکارییەکان و چوونیان بۆ دیمەشق بە یەک شاند.