پۆلێنكاری حیزبی بۆ قوربانیانی جینۆسایدی گەلی كورد بەتوندی ڕەت دەكرێتەوە

ئاڤا نیوز

 

ژمارەیەك نووسەر و چالاكوان و ڕێكخراوەكانی بواری جینۆسایدی گەلی كورد، پۆلێنكاری حیزبی بۆ قوربانیانی جینۆسایدی گەلی كورد ڕەت دەكەنەوە و نیگەرانی خۆیان بەرامبەر لێدوانێكی بەڕێوەبەری فەرمانگەی پاراستنی گۆڕە بەكۆمەڵەكان دەردەبڕن.

 

وێنە گەورەكە: زیا كەریم ئەلساعدی، بەڕێوبەری فەرمانگەی پاراستنی گۆڕە بەکۆمەڵەکان، لە دوو دیداریدا، پۆلینێکی نالۆژیکی بۆ قوربانیانی تاوانەکانی جینۆسایدی گەلی کورد کرد، ئەویش بە ناساندنی قوربانیانی جینۆسایدی ئەنفال بە شەهیدی یەکێتیی نیشتمانی کوردستان و پۆلێنکردنی قوربانیانی جینۆسایدی بارزانییەکان بە شەهیدی پارتی دیموکراتی کوردستان.

 

ڕاگەیێنراوی فەرمی: 26 نووسەر و چالاكوان و ڕێكخراوی داكۆكیکاری جینۆسایدی گەلی كورد ڕایدەگەیێنن: "ئەمجۆرە پۆلێنكارییە وێڕای ئەوەی سووکایەتییەکی گەورەیە بە قوربانییان، هاوکات ئاماژەیەکی مەترسیدارە بۆ کەمکردنەوەی بەهای بڕیارەکانی دادگای باڵای تاوانەکانی عێراق، کە تاوانەکانی ئەنفال و کۆمەڵکوژی بارزانییەکانی وەك تاوانی جینۆساید ناساندووە".

 

ڕوونیشی دەكەنەوە، ئەم لێدوانەی زیا كەریم، لە دوای هەڵدانەوەی گۆڕی بە کۆمەڵی ئەنفالکراوانە لە ناوچەی تەل شەیخییەی بیابانی سەماوە، کە ڕووفاتی منداڵی تەمەن یەك مانگی تێدا بوو، دەپرسن؛ چۆن پۆلێنی حیزبی بۆ قوربانییەکی ئەنفالکراوی تەمەن یەك مانگ دەکرێت، كە هیچ واتایێکی ژیان نازانێت.

 

چی پێویستە بكرێت: ئەو نووسەر و چالاکوانانە داوا دەكەن:

- لیژنەی شەهیدان و قوربانییان لە ئەنجوومەنی نوێنەرانی عێراق، بە مەبەستی لێپێچینەوە، بەڕێوبەری فەرمانگەی پاراستنی گۆڕە بەکۆمەڵەکان بانگهێشتی پەرلەمان بكات.

- پێویستە بەڕێوەبەری فەرمانگەی پاراستنی گۆڕە بەکۆمەڵەکان، بە فەرمی و بە هەردوو زمانی عەرەبی و کوردی، داوای لێبوردن لە ڕۆحی قوربانییانی جینۆسایدی گەلی کورد بکات.