ڕەوتی حیکمە: کورد لایەنێکی کاریگەری هاوپەیمانی ئیدارەی دەوڵەتن

ئاڤا نیوز

ڕەوتی حیکمە کە عەممار حەکیم ڕابەرایەتیی دەکات، هەڵوێستی خۆی ئاشکرا کرد سەبارەت بە ئەگەری کشانەوەی کورد لە پرۆسەی سیاسیی عێراق.

 

چیرۆکی سەرەکی: لە دوایین کۆبوونەوەی ئەنجوومەنی وەزیرانی هەرێمی کوردستان  تایبەت بە پرسی مووچە، گفتوگۆی ئەوە کراوە، ئەوەی حکومەتی عێراق بەرامبەر خەڵکی کوردستان دەیکات ستەمە، لە ئەگەری بەردەوام بوونی دۆخەکە و چارەسەرنەکردنی کێشەکان بەتایبەت مووچە لە سەرەتای ئەمساڵدا، هەڵوێستی تووند بنوێنرێت تاوەکو دەگاتە ئاستی کشانەوە لە پرۆسەی سیاسیی عێراق.

 

لێدوانی فەرمی: سەباح ساڵحی، ئەندامی مەکتەبی جێبەجێکاری ڕەوتی حیکمە لە گەشتی هەواڵەکانی کاتژمێر 12:00ی ئاڤا میوان بوو، لەمبارەیەوە وتی:

 

- هێزە کوردییەکان لایەنی سەرەکی پێکهێنانی حکومەتەکەی محەممەد شیاع سوودانین و لایەنێکی کاریگەری هاوپەیمانی ئیدارەی دەوڵەتن و بەبێ کورد کاروباری دەوڵەت بەڕێوەناچێت. 

 

- کێشەکانی نێوان هەولێر و بەغدا، بەتایبەتی بابەتی مووچە و نەوت هونەرین، هیچ مەرامێکی سیاسییان لەپشتەوە نییە، بۆیە چارەسەرکردنیان ئاسانە و ناگاتە ئەو ڕادەیەی هەولێر لە پرۆسەی سیاسی عێراق بکشێتەوە.