عەدنان موفتی: یەکڕیزبین بەغدا حسابمان بۆ دەکات و ناتوانێت مافەکانمان پێشل بکات

ئاڤا نیوز

 

سەرۆکی پێشووتری پەرلەمانی کوردستان داوا لەلایەنە سیاسییەکانی هەرێمی کوردستان دەکات، بە لەبەرچاگرتنی بەرژەوەندییەکانی گەلەکەمان و بەرگریکردن لە مافەکانمان، پێویستە یەکڕیز و کۆکبین، بەو جۆرەش بەغدا مامەڵەی لەگەڵمان دەگۆڕێت و حسابمان بۆ دەکات".

 

وێنە گەورەکە: سەرەڕای ئاڵۆزییەکانی ناوچەکە و ئەو دۆخەی لە ڕۆژهەڵاتی ناوەڕاست هاتووتە ئاراوە، عێراق لە پێشێلکردنی مافە دەستوورییەکانی هەرێمی کوردستان و سزادانی خەڵکەکەی بەردەوامە، بۆیە کورد لەمە نیگەرانە.

 

لێدوانی فەرمی: عەدنان موفتی، سەرۆکی پێشووتری پەرلەمانی کوردستان، بە ئاڤا میدیای ڕاگەیاند:

 

-هەموو ئەو لایەنانەی بەشداری هەڵبژاردنیان کردووە و ئەوانەشی بەشدار نەبوون، پێویستە کۆببنەوە و تاوتوێی ئەو دۆخە بکەن و چی پێویستە هەنگاوی بۆ بنێن، ئەمە پەیوەندی بە هەموو تاکێکی کوردەوە هەیە، دەبێت کورد لە ئاستی ئەم بەرپرسیارێتییەدابێت.

 

- "ئێمە پەرلەمانمان هەیە و دەبێت کۆببێتەوە و لەبەر ڕۆشنایی هێزە سیاسییەکان بڕیار بدات، ئەمەش دەبێتە هێزێکی گەورە بۆمان، کورد دۆستی زۆرە و بۆ جیهانی سەلماندووە کە ئازادیخوازە و ژیان دۆستە، سەرکەوتنەکانی لە شەڕی داعش سەرنجی دونیای ڕاکێشاوە، ئەگەر یەکڕیز نەبین ئەوا ئەمانە لەبیردەچنەوە، بۆیە دەبێت هەموومان لەبەر بەرژەوەندییەکانی گەلەکەمان و بەرگریکردن لە مافەکانمان کۆکبین، بەو جۆرەش بەغدا مامەڵەی لەگەڵمان دەگۆڕێت و حسابمان بۆ دەکات".

 

- هەر کەس لای خۆیەوە بچێتە بەغدا ئەوا دەبێتە خاڵی لاوازی کورد، چونکە بەغدا بە یەکگرتوویی حساب بۆ کورد دەکات و مامەڵەی لەگەڵی دەگۆڕێت، "ئەو کاتە ناتوانێت مافە دەستووریەکانمان پێشێل بکات، هەموو دونیاش پشتگیریمان دەکات و عێراق ناتوانێت بە ئاسانی پشتگوێمان بخات".