لایەنە سیاسییەكان پشتگیری دەستپێشخەرییە نیشتمانییەكەی سەرۆکوەزیران دەكەن

ئاڤا نیوز

بەشێك لە بەرپرسانی حیزب و لایەنە سیاسییەكانی كوردستان لەڕێگەی ئاڤاوە دووپات لە یەكدەنگی و هاوهەڵوێستی لایەنە كوردستانییەكان دەكەنەوە لەپێناو سنووردانان بۆ پێشێلكردنی مافە دەستوورییەكانی هەرێمی كوردستان لەلایەن بەغداوە.

چیرۆكی سەرەكی: دەستپێشخەرییە نیشتمانییەكەی سەرۆکوەزیران مەسرور بارزانی، بۆ یەکدەنگی و یەکهەڵوێستی لایەنە کوردستانییەکان بەرامبەر بەغدا لەپێناو دابینکردنی مووچە و بودجە و مافە دەستوورییەکانی خەڵکی کوردستان، کەشێکی سیاسیی ئەرێنی ڕەخساندووە و هەنگاوەکانی پێکهێنانی کابینەی 10ـی حکومەتی هەرێمی کوردستان خێراتر دەکات.

 

وێنە گەورەكە: ڕۆژی شەممە 11-1-2025، كۆبوونەوەی نائاسایی ئەنجوومەنی وەزیرانی حكومەتی هەرێمی كوردستان بە سەرۆكایەتیی سەرۆكوەزیران، مەسرور بارزانی، قوباد تاڵەبانی، جێگری سەرۆكی حكومەتی هەرێمی كوردستان و بە بەشداری وەزیرە كوردەكانی حكومەتی فیدراڵی و نوێنەری فراكسیۆنە كوردستانیەكانی پەرلەمانی عێراق، لە شاری هەولێر بەڕێوەچوو، لەپێناو یەكڕیزی و هاوهەڵوێستی لایەنە كوردستانییەكان لەبەرامبەر پێشێلکردنی مافە دەستوورییەکانی هەرێمی کوردستان لەلایەن حکومەتی فیدراڵییەوە.

لێدوانە فەرمییەکان:

- محەممەد حاجی مەحموود، سکرتێری حزبی سۆسیالیست دیموکراتی کوردستان ڕایگەیاند: "من لەگەڵ کشانەوەم لە بەغدا، چونکە بەغدا كار بۆ كورد ناكات، ڕەنگە فشاریان لەسەر بێت و هەندێک کار بکەن، بەڵام دیسان دەچنەوە سەر ئەقڵە کۆنەکەی پێشتر".

 

- دانا ئەحمەد مەجید، ڕێکخەری گشتیی بزووتنەوەی گۆڕان وتی: "ئێمە بڕوامان وایە جیاوازییەکانمان و کێبڕکێی سیاسیی لەناوخۆی هەرێمی کوردستان نەبەینە بەغدا، بەڵکو لە بەغدا هەمووان بەیەکەوە ببینە هێزی فشار و داکۆکیکار، بۆ بەرگریکردن لە مافە دەستورییەکانی خەڵکی کوردستان"
 
- عدنان موفتی، سەرۆکی پێشووتری پەرلەمانی کوردستان ئاماژەی بەوەكرد: "یەکڕیزبین، بەغدا حسابمان بۆ دەکات و ناتوانێت مافەکانمان پێشل بکات، هەموو ئەو لایەنانەی بەشداری هەڵبژاردنیان کردووە و ئەوانەشی بەشدار نەبوون، پێویستە کۆببنەوە و تاوتوێی ئەو دۆخە بکەن و چی پێویستە هەنگاوی بۆ بنێن، ئەمە پەیوەندی بە هەموو تاکێکی کوردەوە هەیە، دەبێت کورد لە ئاستی ئەم بەرپرسیارێتییەدابێت".

 

- دارا سێکانیانی، ئەندامی فراکسیۆنی یەکگرتوو لە پەرلەمانی عێراق، دەڵێت: "گەرەنتی بۆ شایستە داراییەکان و سەقامگیری ئابووری و ئیداری بۆ کورد دروست نەبووە، بۆیە دەبێت بە یەک پاکێج مامەڵە لەگەڵ بەغدا بکرێت".

 

- ئایدن مەعرووف، ئەندامی مەکتەبی سیاسی بەرەی تورکمانی ڕایگەیاند: "بەغدا نەفەسێکی دوژمنکارانەی بەرامبەر هەرێمی كوردستان و مووچەخۆرانی هەیە". دووپاتیشی دەكاتەوە، "سەرۆکوەزیران بارزانی ڕۆلێکی گەورەی هەیە تا کورد لە بەغدا بکاتە تیمێکی بەهێزی یەکگرتوو".

 

- مونا قەهوەچی، جێگری سەرۆکی پارتی چاکسازیی تورکمان وتی: "پێویستە حکومەتی عێراق پابەند بکرێت بەوەی هەموو ماددەکانی دەستوور جێبەجی بکرێت، نەک تەنیا ئەوانەی لە بەرژەوەندیی عێراق و دژی هەرێمی کوردستانن، دەستپێشخەرییەکەی سەرۆکوەزیران لە کات و ساتێکی گونجاودا بوو."