لە کەمپی زانکۆی دهۆک سەگێکی بێلانە پەلاماری کچێک دەدات

ئاڤا نیوز

 

لە کەمپی زانکۆی دهۆک ژمارەیەک سەگی بێلانە پەلاماری قوتابیەکی کچ دەدەن، کچەکەش ڕادەکات و بە زەحمەت لە دەستیان دەردەچێت.

 

وێنە گەورەکە: دیاردەی زیادبوونی سەگی بێلانە لە شەقام و كۆڵانەكانی شار و شارۆچكەكانی هەرێمی كوردستان، چەند ساڵێکە بەردەوامە، سەرەڕای كردنەوەی چەندین شەڵتەری تایبەت بە بەخێوكردنی سەگە بێلانەكان، بەڵام تاوەکو ئێستا نەتوانراوە ژمارەیان کەم بکرێتەوە و مەترسی پەلاماردانیان بنبڕ بکرێت.

 

گرتەی ڤیدیۆیی: وەك لە دیمەنەكان دەردەكەوێت ژمارەیەكی زۆر سەگی بێلانە کەوتوونەتە گیانی كچە قوتابییەك و هەوڵدەدەن پەلاماری بدەن، بەڵام بە هەرجۆرێک بێت خۆی لێیان دەرباز دەكات.

 

زانیاری بەدەستهاتوو: بەگوێرەی زانیارییەكانی ئاڤا، سەگە بێلانەكان هەر لەنێو بەشە ناوخۆییەكە بڵاوبوونەتەوە و مەترسیان بۆ سەر كچە قوتابییەكان درووستكردووە.

 

چارەسەرەکان: هەوراز گوڵپی لە شاشەی ئاڤا میدیاوە داوا لە شارەوانییەکان و لایەنی پەیوەندیدار دەکات هەرچی زووە ئەو گرفتە چارەسەربکرێت.

 

ئەوەی پێویستە بیزانیت: نزیکەی ساڵ و نیوێکە پرۆسەی کۆکردنەوەی ئاژەڵی بێلانە دەستیپێکردووە، ئەمەش وایکردووە حاڵەتەکانی گەستن و پەلاماردانی لە سنووری هەولێر 47% کەم بکات، هەر لەو ماوەیەشدا نزیکەی 13 هەزار سەگی بێڵانە کۆکراونەتەوە و چارەسەریان وەرگرتووە.

 

ئەمەش بزانە: لە شێڵتەری سنووری سلێمانی نزیکەی هەزار سەگ کۆکراونەتەوە، لە دهۆکیش کارەکانی تەواوکردنی شەڵتەری کۆکردنەوەی سەگ بەرەو کۆتایی دەڕوات.