ئەنەکەسە: کوردانی ڕۆژئاوا گەشبینن بە هەوڵەکانی سەرۆک بارزانی بۆ یەکڕیزی کورد

ئاڤا نیوز 

 

گوتەبێژی ئەنەکەسە کۆبوونەوەی نوێنەری سەرۆک بارزانی لەگەڵ ئەنەکەسە و هەسەدە بە کۆبوونەوەیەکی مێژوویی ناو دەبات و دەڵێت: کوردانی ڕۆژئاوا گەشبینن بە هەوڵەکانی سەرۆک بارزانی بۆ یەکڕیزی کورد.

 

وێنەگەورەکە: ڕۆژی 13-1-2025، عەبدولحەمید دەربەندی، نوێنەری سەرۆك بارزانی، لە حەسەکە بۆ یەکەمجار لەگەڵ مەزڵووم عەبدی، فەرماندەی گشتیی هەسەدە کۆبووەو دواتر سەردانی قامشلۆی کرد و لەگەڵ ئەنەکەسە کۆبووەوە.

 

لێدوانی فەرمی: فەیسەڵ یوسف گوتەبێژی ئەنەکەسە، لە کاتی بەشداریکردنی لە هەواڵەکانی بادینی ئاڤادا گوتی: دوای سەردانەکەی بۆلای مەزڵووم عەبدی، حەمید دەربەندی، نوێنەری سەرۆک بارزانی،  سەردانی ئێمەشی کرد و نامەی مەزڵووم عەبدی پێگەیاندین" پەیامەکەی جێگەی ڕێزە و زۆر ناخایەنێت، جارێکی دیکە ئێمە و هەسەدە کۆدەبینەوە".

 

فەیسەڵ یوسف دەشڵێت: مەزڵووم عەبدی دووپاتی لە گرنگی و بایەخپێدانی پەیامەکەی سەرۆک بارزانی  بۆ پێکەوە کارکردنی کورد لە ڕۆژئاوای کوردستان و سووریای نوێ کردووەتەوە".

 

لە لایەکی دیکەوە: داواکاری ئێمە لە هەسەدە جێبەجێکردنی ئەو گەرەنتیەیە کە پێشووتر گفتوگۆمان لەسەر کردووە و بڕیاری لەسەر دراوە، و جارێکی دیکە داوای ئاشکراکردنی چارەنووسی گیراوانمان لێیان کردووە. فەیسەڵ یوسف وا دەڵێت.

 

باکگراوند: لە ساڵی 2012وە سەرۆک بارزانی لە لایەک و ئەمریکا و فەڕەنسا لە لایەکی دیکەوە، داوا لە هەسەدە دەکەن، بە گفتوگۆ کێشەکانی خۆیان لەگەڵ ئەنەکەسە چارەسەر بکەن و بەیەکەوە ئیدارەی ڕۆژئاوایی کوردستان بدەن.