ئەمریکا: نابێت حەماس فەڵەستین بەڕێوە ببات

ئاڤا نیوز 

 
وەزیری دەرەوەی ئەمریکا ڕایگەیاند، ئاگربەستی غەززە کە لە چەند ڕۆژی داهاتوو ڕادەگەیێنرێت، کشانەوەی سوپای ئیسرائیل و دامەزراندنی دەسەڵاتێک بۆ بەڕێوەبردنی غەززە لە خۆدەگرێت، جەختیش دەکاتەوە کە واشنتن کار بۆ دانانی بەرنامەیەکیش بۆ دوای شەڕ لە فەڵەستین دەکات.

 

وێنە گەورەکە: دوای حەوتی ئۆکتۆبەری 2023 و هێرشی حەماس بۆ سەر ئیسرائیل، شەڕ و پێکدادان لە نێو کەرتی غەززە بەردەوامە. تاوەکو ئێستا نزیکەی 46 هەزار کەس کوژراون و سەروو 110 هەزاری دیکە بریندارن. 

 

لێدوانی فەرمی: ئەنتۆنی بلینکن، وەزیری دەرەوەی ئەمریکا ڕایگەیاند، "فەڵەستینییەکان مافی خۆیانە چارەنووسی خۆیان دیاریبکەن بەڵام قبووڵناکرێت دەوڵەتی فەڵەستین لەلایەن حەماس بەڕێوە ببردرێت، پڕۆژەی ئاگربەستیش کشانەوەی ئیسرائیل و دامەزراندنی دەسەڵاتێک بۆ بەڕێوەبردنی غەززە لە خۆدەگرێت".

 

ئاماژەی بەوەشکرد، لەگەڵ هاوبەشەکانیان کاردەکەن بۆ گەشەپێدانی بەرنامەی دوای کۆتاییهاتنی شەڕ لە غەززە، ئەگەر حەماسیش ڕەزامەندی لەسەر بدات، ئاگربەستەکە ڕاستەوخۆ دەکەوێتە بواری جێبەجکردنەوە. ئەمریکاش کار بۆ ئاگربەستێکی هەمیشەیی لە غەززە دەکات و دەبێت نەخشەڕێگایەکیش ئامادەبکرێت تا فەڵەستینی و ئیسرائیلییەکان بە ئازادی و شکۆوە پێکەوە بژین. 

 

وەزیری دەرەوەی ئەمریکا وتیشی، هاووڵاتیانی مەدەنی لە غەززە قوربانی ململانێکانن و هیچ پەیوەندییەکیان بەم شەڕەی ئێستاوە نییە، لە هەمان کاتیشدا ئەمریکا کاردەکات بۆ بەدیهێنانی خواستی ئیسرائیلییەکانیش لە بوونی ئاسایش و ئارامی.