بەراورد بە کوردستان ئاماری ڕووداوەکانی هاتووچۆ لە شارەکانی عێراق شۆکهێنەرن

ئاڤا نیوز

لە کاتێکدا لە هەرێمی کوردستان بەشێک لە شۆفێران ڕەخنە لە دانانی کامێرای تۆمارکردنی تیژڕۆیی دەگرن، ئامارێکی فەرمیی دەزگای ناوەندیی ئاماری عێراق سەبارەت بە ڕووداوە کوشندەکانی هاتووچۆ لە پارێزگاکانی عێراق (جگە لە هەرێمی کوردستان) بەڕوونی گرنگیی بوونی ئەم کامێرایانە نیشان دەدات.

ئامارەکە شۆکهێنەرە و ژمارەیەکی زۆر قوربانی لەخۆدەگرێت، ئەمەش دەریدەخات کە نەبوونی سیستمێکی تۆمارکردنی تیژڕۆیی چەندە کاریگەریی خراپی هەیە.

ئەوەی پێویستە بیزانیت: بەهۆی کەمیی ڕووداوەکانی هاتووچۆ و کەمیی ژمارەی قوربانییەکان لە هەرێمی کوردستان، دەزگاکە ئاماری پارێزگاکانی هەرێمی کوردستانی لە ئامارە گشتییەکەدا دەرهێناوە. دەزگای ناوەندیی ئاماری عێراق جەخت لەوە دەکاتەوە کە ئەم کەمبوونەوەی ڕووداوانە لە کوردستاندا، بە پلەی یەکەم، بەهۆی دانانی کامێرای تۆمارکردنی خێراییە لە شەقام و ڕێگاکانی کوردستان.

ژمارەکان وا دەڵێن: بەپێی نوێترین ئامارەکانی دەزگاکە، تەنیا لە ساڵی 2024دا (جگە لە هەرێمی کوردستان):

٠ 11 هەزار و 738 ڕووداوی هاتووچۆ تۆمار کراون.

٠ لەناو ئەم ڕووداوانەدا، دوو هەزار و 103 حاڵەت هەبووە کە لە یەک ڕووداودا چەندین کەس گیانیان لەدەست داوە.

٠ نۆ هەزار و 660 ڕووداوی دیکە بوونەتە هۆی برینداربوون و زیانی ماددی.

٠ بە تێکڕا، ڕۆژانە 32 ڕووداوی هاتووچۆ ڕوودەدەن، کە نزیکەی شەش ڕووداویان کوشندەن.

٠ نزیکەی هەموو چوار کاتژمێرێک ڕووداوێکی کوشندەی هاتووچۆ ڕوودەدات و چەند کەسێک گیان لەدەستدەدەن.

زانیاریی زیاتر: دەزگای ناوەندیی ئامار ئاشکراشی کردووە کە ڕێگاکانی نێوان بەغدا - کەرکووک، ناسرییە - بەسرە، بەغدا - مووسڵ و نەجەف - کەربەلا زۆرترین ڕووداوی کوشندەیان لێ ڕوودەدات و بەشێکیان بە "ڕێگای مەرگ" ناوبراون.