تا مانگی ڕەمەزان هەزار مامۆستای ئایینی بەخۆڕایی گەشتی عومرەیان بۆ ڕێكدەخرێت

ئاڤا نیوز

لە ماوەی كابینەی نۆیەمدا، زیاتر لە 500 مامۆستای ئایینی بەخۆڕایی گەشتی عومرەیان ئەنجامداوە، پلانیش وایە؛ تاوەكو مانگی ڕەمەزان، گەشتی عومرە بۆ هەزار مامۆستای دیكەی ئایینی بەخۆڕایی ڕێكبخرێت.

وێنە گەورەکە: لە ماوەی کابینەی نۆیەمدا، گۆرانکاریی گەورە و ڕیشەیی لە سیستمی دیجیتاڵی بۆ ڕاییكردنی سەرجەم مامەڵە حكومییەكان كراوە، پرۆسەی حەج و عومرە لە هەرێمی كوردستان هەنگاوی جۆریی ناوە و لە ئایندەشدا گۆڕانكاری و خزمەتگوزاریی زیاتر پێشكەش بە حاجییان و عومرەكاران دەكرێت.

لێدوانی فەرمی: کاروان ستونی، گوتەبێژی حەج و عومرەی کوردستان بە ئاڤای ڕاگەیاند، بەمەبەستی هاوکاریکردنی مامۆستایانی ئایینی و زیاتر گرنگی پێدانیان، لەماوەی کابینەی نۆیەمی حکومەتی هەرێمی کوردستاندا، گەشتی عومرە بۆ زیاتر لە 500 مامۆستای ئایینی بەخۆڕایی ڕێکخراوە و پلانمان وایە، تاوەكو ڕەمەزان هەزار مامۆستای ئایینی ببەینە گەشتی عومرە.

زانیاریی زیاتر: بەگوتەی ستوونی، لە ماوەی چوار ساڵی ڕابردوودا، نزیکەی 200 مامۆستای ئایینی و موفتی، پرۆسەی حەجیان بەخۆرایی ئەنجام داوە و ساڵ بە ساڵیش بە هاوکاری وەزارەتی ئەوقاف و کاروباری ئایینی و بە پاڵپشتی خودی وەزیر، گرنگی زیاتر بە مامۆستایانی ئایینی دەدرێت چ ئەوانەی بە شێوەی هەمیشە دامەزراون یاخود ئەوانەی گرێبەست و خۆبەخشن.

باكگراوند: ساڵانە زیاتر لە 40 مامۆستا ئایینی و پێنج موفتیی هەرێمی کوردستان، بەخۆرایی بەشداری پرۆسەی حەج دەکەن؛ بەمەبەستی ڕێنماییکردنی حاجییان لە بەجێگەیاندنی فەریزەی حەج و جێبەجێكردنی مەناسیكەكان بەشێوەی دروست.