هەژماری من و کۆمپانیای ڤیزا ڕێککەوتنێکی ستراتیژی واژۆ دەکەن

ئاڤا نیوز

 

لە درێژەی هەوڵەکانی حکومەتی هەرێمی کوردستان بۆ بەهێزکردنی ژێرخانی ئابووری و بە دیجیتاڵیکردنی دارایی، پرۆژەی هەژماری من ڕێککەوتنێکی ستراتیژی لەگەل کۆمپانیای ڤیزای جیهانی واژۆ دەکات.

 

ڕاگەیێنراوی فەرمی: وەزارەتی دارایی و ئابووریی هەرێمی کوردستان ڕایگەیاند: لە چوارچێوەی ڕێککەوتنی پرۆژەی هەژماری من و کۆمپانیای ڤیزا، کۆمپانیاکە بە هاوبەشی لەگەڵ وەزارەتی دارایی و ئابووری چەندین سیمینار و وۆرکشۆپ بۆ سوودمەندانی پڕۆژەکە ڕێکدەخات سەبارەت بە سوودەکانی گشتگیری ئابووری و شیکردنەوەی باشترین ڕێگاکانی بەکارهێنان و سوودوەرگرتن لە پارەدانی دیجیتاڵی و سوود و خزمەتگوزاریەکانی بانکی.

 

لێدوانی فەرمی: ماریۆ مەکاری، جێگری سەرۆک و بەڕێوەبەری گشتیی کۆمپانیای ڤیزا لە ڕۆژهەڵاتی ناوەڕاست لەبارەی ئەم ڕێكکەوتنە ڕایگەیاند:

 

- هۆشیاری و گشتگیری ئابووری بناغەی بەهێزکردن و پەرەپێدانی ئابوورین.

 

- ڤیزا پابەندە بەو ڕۆڵە گرنگەی پێیدراوە لەو قۆناغە ڕاگوزەرییە لە هەرێمی کوردستان لەڕێگای بەگەڕخستنی ئەزموونی کۆمپانیاکەمان لە سەرانسەری جیهان بۆ درووستکردنی ئابووریێکی دیجیتاڵی پارێزراو".

 

بۆچی گرنگە: ئەم ڕێککەوتنە هەنگاوێکی گرنگە بۆ گەیشتن بە ئامانجی پەرەپێدانی شێوازەکانی پارەدانی دیجیتاڵی و بەرەو پێشبردنی گشتگیری ئابووری لە رێگەی ئەنجامدانی چەندین کەمپەینی پەروەردەیی و هۆشیاری لە بارەی پارەدانی دیجیتاڵی و خزمەتگوزارییە بانکییەکان لە هەرێمی کوردستان، کە ئەمەش هاوکاریی فەرمانبەران و مووچەخۆران دەکات لەوەی کە بتوانن زیاتر پشت بە پارەدانی دیجیتاڵی لە کاروباری ڕۆژانەیاندا ببەستن، ئەمەش بەوپێیەی بەمزووانە نزیکەی یەک ملیۆن هاووڵاتیی هەرێمی کوردستان مووچەکانیان بەشێوەی دیجیتاڵی وەردەگرن.

 

زانیاریی زیاتر: ئەم هاوبەشییە پابەندی حکومەتی هەرێمی کوردستان و کۆمپانیای ڤیزا لەبارەی هەوڵەکانیان بۆ کەمکردنەوەی پشتبەستن بە پارەدان لە ڕێگای کاش و ئاسانکردنی دەستگەیشتن بە خزمەتگوزاری و سوودە بانکییەکان و بنیاتنانی ئابووریەکی دیجیتاڵی گشتگیر و بەهێز دەردەخات.