کار لەسەر تەواوکردنی شووقەی کەمدەرامەتان دەکرێت

ئاڤا نیوز

دوای دوو ساڵ لە وەستاندنی پڕۆژەی دروستکرنی یەکەی نیشتەجێبوون بۆ خێزانە کەمدەرامەتەکانی هەرێمی کوردستان، وەزارەتی ئاوەدانکردنەوە و نیشتەجێکردن چەند پێشنیازیکی نوێ تاوتوێ دەکات بەمەبەستی دەستپێکردنەوەی کارکردن لە تەواوکردنی یەکەکان.

وێنە گەورەکە: نۆ هەزار و 4 یەکە لەسەرجەم پارێزگا، ئیدارە سەربەخۆ و قەزاکانی هەرێمی کوردستان بەشێکیان بوویادنراون و بە ڕێژەی جیاواز گەیشتوونەتە ئاستی تەواوبوون، بەڵام بەهۆی قەیرانی دارایی حکومەتی هەرێمی کوردستان نەیتوانیوە کار لەسەر تەواوکردنیان بکات، بەهۆی کەمی قازانجیش وەبە‌رهێنەرەکان پڕۆژەکە وەرناگرن.

لێدوانی فەرمی: بەیار تەقیێددین، بەڕێوەبەری بەشی بیناسازی لە وەزارەتی ئاوەدانکردنەوە و نیشتەجێکردن لە بەرنامەی مۆری ئاڤا گوتی، "بۆ تەواوکردنی ئەو یەکانە پێویستمان بە 300 ملیار دینارە، لەماوەی داهاتوو نووسراو بۆ ئەنجوومەنی وەزیران دەکەین بۆ دابینکردنی ئەو بڕە."

زانیاریی زیاتر: بەگوتەی بەڕێوەبەری بەشی بیناسازی لە وەزارەتی ئاوەدانکردنەوە و نیشتەجێکردن، قەرزکردنی پارە لە پشکی وەزارەتی ئاوەدانکردنەوەی عێراق یەكێک دەبێت لە پێشنیازەکان.

بۆچی گرنگە: بەگوێرەی ئامارێکی یەکێتیی کرێنشینانی هەرێمی کوردستان نزیکەی 650 هەزار یەکە لەسەرجەم پارێزگاکانی هەرێمی کوردستان چۆڵکراون، تەواوکردنی ئەو یەکانە بەڕێژەیەکی بەرچاو کرێی یەکەکان دادەبەزێنێت.

ژمارەکان وادەڵێن: 26 هەزار کەس ناوی خۆیان بۆ وەرگرتنی ئەو یەکانە تۆمارکردووە و پرۆسەکە دەیانگرێتەوە، یەکەکان بەمشێوەیە بەسەر ناوچەکان دابەش دەبن:-

 

 

هەولێر: هەزار و 356 یەکە.

سلێمانی: سێ هەزار و 876 یەکە.

دهۆک: دوو هەزار و 116 یەکە.

هەڵەبجە: 192 یەکە.

ئیدارەی گەرمیان: 360 یەکە.

ئیدارەی سۆران: 360 یەکە.

ئیدارەی راپەرین: 420 یەکە.

ئیدارەی زاخۆ: 324 یەکە.