لە دەروازەی کێلێ بەهۆی بەفربارینەوە ئاستەنگی هاتووچۆ دروستبووە

ئاڤا نیوز

 

لەبەرەبەیانی ئەمڕۆوە شەپۆلێکی بەفربارین ناوچە شاخەوییەکانی قەزای پشدەری گرتووە و بەهۆیەوە ئاستەنگی هاتووچۆ بۆ شۆفێرانی دەروازەی کێلێ دروستبووە. 

 

چیرۆکی سەرەکی: تاوەکو ئێستا بەفربارین لە ناوچە سنوورییەکانی قەزای پشدەر بەردەوامە، بەهۆیەوە جووڵەی بازرگانی لەو سنوورە بە تەواوی پەکی کەوتووە و هیچ بارهەڵگرێکیش ناتوانێت جووڵە بکات.

 

لێدوانی فەرمی: عەباس عەزیز، بەڕێوەبەری گومرگی ڕاپەڕین بە ئاڤا نیوزی ڕاگەیاند: بەهۆی ئەو بەفربارینە چڕەی سنوورەکەی گرتووەتەوە و ئاستەنگی هاتووچۆ بۆ شۆفێران دروستبووە و دوو ئۆتۆمبێلی هاونیشتمانیانی هەرێمی کوردستان لە دیوی ئێران وەرگەڕاون و زیانی گیانی نییە، تیمەکانی پاککردنەوەش بەردەوامن لە ڕاماڵینی بەفر و جووڵەی هاتووچۆ زۆر ئەستەم بووە. 

 

مامە بەکر، کارمەندی بەشی بیمەی ئۆتۆمبێل لە دەروازەی کێلێ بە ئاڤای ڕاگەیاند: بەهۆی بەفربارینەوە ڕێگای سەرەکی دەروازەی کێلێ داخراوە و جووڵەی بازرگانی لە نێوان هەرێمی کوردستان و کۆماری ئیسلامی ئێران لەو سنوورە بە تەواوی وەستاوە. 

 

باکگراوند: دەروازەی کێلێ دەروازەیەکی سنوورییە لە نێوان هەرێمی کوردستان و ئێران، ڕۆژانە سەدان بارهەڵگر کەرستەی بیناسازی و ماددەی پاککەرەوە و چەندین جۆر کەلوپەلی دیکە ئاڵوگۆڕ دەکەن لەگەڵ بوونی هاتووچۆی گەشتیاریش.