هۆشداری لە ناتەندروستیی هەوای تاران دەدرێت

ئاڤا نیوز

بەپێی پێوەرەکانی کوالێتیی هەوا (AQI)، بەهۆی پیسیی هەواکەیەوە تارانی پایتەختی ئێران لە دۆخی سوور نزیک دەبێتەوە.

چیرۆکی سەرەکی: ماوەی چوار ڕۆژە هەوای تاران بە هۆی پیسبوونەوە لە دۆخی پرتەقاڵی واتە "دۆخی ناتەندروست بۆ گرووپە هەستیارەکان"ـدایە و تا دێت لە دۆخی سوور نزیک دەبێتەوە. لە دۆخی پرتەقاڵیدا ئەو کەسانەی نەخۆشیی دڵ یان سییەکانیان هەیە، بە تایبەت بەساڵاچووان و منداڵان دەبێت خۆیان لە چوونە دەرەوە بۆ ماوەیەکی درێژ بەدوور بگرن.

زانیاریی زیاتر: ئاژانسی تەسنیمی ئێران بڵاوی کردووەتەوە، بەپێی پێوەرەکانی کوالێتیی هەوا ئەگەر ژمارەی (AQI) لەنێوان 51 بۆ 100 بێت واتە کواڵێتیی هەوا قبووڵکراوە، بەڵام ئەگەر پێوەرەکە لەنێوان 101 بۆ 150 بێت، ئەوا هەوا لە بارودۆخی "ناتەندروست بۆ گرووپە هەستیارەکان"ـدایە.

ئەوەی پێویستە بیزانیت: هەر بەپێی پێوەرەکانی کوالێتیی هەوا لە سەرەتای ئەمساڵەوە تا ئێستا شاری تاران تەنیا شەش ڕۆژ هەوای پاکی هەبووە، 123 ڕۆژ هەواکەی لە دۆخی قبووڵکراودا بووە، 105 ڕۆژ لە دۆخی ناتەندروست بۆ گرووپە هەستیارەکان و هەشت ڕۆژ دۆخی ناتەندروست بۆ هه موو گرووپەکان، دوو ڕۆژ هەوای زۆر ناتەندروست و دوو ڕۆژیش هەوای مەترسیداری هەبووه.

لەلایەکی دیکەوە: بەهۆی پیسبوونی هەوای شارەکانی ئێران بەگشتی پەتای ئەنفلۆنزا و کۆرۆنا لەنێو منداڵاندا بڵاوبووەتەوە و بڕیاری داخستنی چەند قوتابخانەیەکیش دراوە.

لێدوانی فەرمی: عەلیڕەزا ڕەئیسی، جێگری وەزیری تەندروستیی ئێران دەڵێت، پەتاکە تاوەکو دوو مانگی دیکە بەردەوام دەبێت، داوا لە خەڵکی وڵاتەکەی دەکات لەکاتی چوونە دەرەوە ماسک بەکاربێنن.