بەمزووانە لە کانی قڕژاڵە و خەبات زەوی بەسەر فەرمانبەران دابەش دەکرێت

ئاڤا نیوز

پڕۆسەی دابەشکردنی زەوی بەسەر فەرمانبەران بەردەوامە، هەر شارەوانییەک زەوییەکانی ئامادە بێت تیروپشک بۆ  دابەشکردنی دەکرێت، ئامادەکارییەکان لە کانی قڕژاڵە و خەبات تەواو کراوە، بە هۆی هەندێک کێشەی تەکنیکی پڕۆسەکە تاوەکو ئێستا دواکەوتووە.

وێنە گەورەکە: بەڕێوەبەرایەتیی شارەوانییەکانی هەولێر بەشێوەیەکی بەردەوام کار لەسەر دابەشکردنی زەوی دەکات لە سنووری شارەوانییەکان، تائێستا زیاتر لە 13 شارەوانی سنووری پارێزگای هەولێر نزیکەی 30 هەزار پارچە زەوی دابەشکراوە، بڕیارە بەمزووانەش زەوی لەسنووری شارەوانی کانی قڕژاڵە و خەبات دابەش بکرێت.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر، بە ئاڤا میدیای ڕاگەیاند، زیاتر لە چوار هەزار پارچە زەوی لە شوێنی گونجاوی ئەو ناوچانە بۆ فەرمانبەران لە سنووری کانی قڕژاڵە و خەبات ئامادە کراوە، بەڵام بەهۆی هەندێک کێشەی تەکنیکی کاتی دابەشکردنی دواخراوە، بەمزووانە کێشەکان چارەسەر دەکرێن لەو دوو شارەوانییەش تیروپشکی زەوی ئەنجامدەدەین.

لەلایەکی دیکەوە: کارزان عەبدولهادی، سەرۆکی شارەوانی هەولێر، بە ئاڤا میدیای ڕاگەیاند، ئامادەکارییەکان بۆ دابەشکردنی قۆناغی پێنجەمی دابەشکردنی زەویی فەرمانبەران لە سنووری شارەوانیی سەنتەری هەولێر دەستیپێکردووە و لە ماوەی کەمتر لە مانگێکی دیکە دەست بە دابەشکردنییان دەکرێت.