پێش سەری ساڵ قۆناغێکی دیکەی دابەشکردنی زەوی لە سلێمانی دەستپێدەکات

ئاڤا نیوز

لە سلێمانی زیاتر لە دوو هەزار پارچە زەوی بەسەر خانەنشینان دابەشکرا و ئامادەکاری دەکرێت پێش سەری ساڵ، 20 هەزار پارچە زەویی دیکە دابەش بکرێت.

وێنە گەورەکە: پڕۆسەی دابەشكردنی زەوی بەسەر فەرمانبەرانی هەرێمی كوردستان بە بڕیاری سەرۆكوەزیران مەسرور بارزانی لە تەواوی ناوچەکان بەردەوامە، لەم چوارچێوەیەدا لە سلێمانی قۆناغێکی دیکەی دابەشکردنی زەوی دەستپێدەکات.

زانیاریی پەیامنێر: چۆمان مەحموود، پەیامنێری ئاڤا لە سلێمانی ڕایگەیاند، لە سلێمانی دوو هەزار و 742 پارچە زەوی بەسەر خانەنشینان دابەشکرا و کۆدەکانیشیان پێدرا.

چۆمان مەحموود ئاشکراشی دەکات، بۆ 20 هەزار فەرمانبەری دیکەی سلێمانی، زەوی دیاریکراوە، بەپێی ئەو لیژنەیەی کە شارەوانی دەستیپێکردووە، زەوییەکان لە کشتوکاڵی کوژێنراونەتەوە و کۆتایی بە کارەکانیان هاتووە، تەنیا هەندێک ڕێکار لە فەرمانگەی تاپۆ ماوە ئەنجام بدرێت.

هەر بەپێی زانیارییەکانی پەیامنێری ئاڤا میدیا لە سلێمانی، زەوییەکان بەر لە ساڵی نوێ دابەش دەکرێن و بەشێوەی ئاشکرا تیروپشک دەکرێت بۆ پێدانی کۆدەکان بەو فەرمانبەرانەی کە ناویان هاتووەتەوە.

زانیاریی ئاڤا: بەپێی زانیارییەکانی ئاڤا میدیا، زەوییەکان لە سێ شوێنی سلێمانین، "سۆتکە، تانجەڕۆ، ڕاپەڕین". هەروەها زەوییەکان 200 مەترن و شارەوانی دەڵێت، بەزووترین کات خزمەتگوزاریشیان بۆ دابین دەکرێت.

ئەمەش بزانە: ئەم پرۆسەیە بەردەوام دەبێت بۆ ئەو خانەنشینانەی دیکەش کە ماون زەوییان پێبدرێت، چونکە ناوی هەشت هەزار خانەنشینی دیکەش نێردراوە بۆ ئەنجوومەنی وەزیران و ڕەزامەندیشی لەسەر دراوە، دوای ئەوە دەنێردرێتەوە بۆ شارەوانی سلێمانی، لە قۆناغی سێیەمدا زەوییەکانیان پێ دەدرێت.