لە سەرەتای شەڕی غەززەوە حەماس 15 هەزار کەسی چەکدار کردووە

ئاڤا نیوز

 

بەگوێرەی زانیارییەکان لەدوای حەوتی ئۆکتۆبەری 2023ـەوە کە شەڕی نێوان ئیسرائیل و بزووتنەوەی حەماس دەستیپێکرد، حەماس لەنێوان 10 بۆ 15 هەزار چەکداری بۆ ڕیزەکانی زیاد کردووە.

 

زانیاریی زیاتر: بەگوێرەی زانیارییەکانی دوو سەرچاوەی کۆنگرێسی ئەمریکا کە بە هەواڵگریی ئەمریکایان داوە و ئاژانسی ڕۆیتەرز بڵاویکردووەتەوە، لە ماوەی شەڕدا حەماس 10 تاوەکو 15 هەزار چەکداری نوێی بۆ ڕیزەکانی زیاد کردووە، ئەگەری ئەوەش هەیە ئەوەندە چەکداریشی لەدەست دابن.

 

ئەوەی پێویستە بیزانیت: سەرچاوەکە ئاماژەی بەوەش کردووە کە لەگەڵ ئەوەدا زۆربەی چەکدارە نوێکانی حەماس گەنجن، بەڵام ڕاهێنانی پێویستیان پێ نەکراوە. لەگەڵ ئەوەشدا بوونی ئەم ژمارە زۆرە لە چەکدار وا دەکات حەماس وەک هەڕەشەیەکی بەردەوام بۆ سەر ئیسرائیل بمێنێتەوە.

 

قوڵتر: ئەمە لە کاتێکدایە ئیسرائیل بە ئامانجی لەناوبردنی حەماس هێرشی سەر کەرتی غەززەی دەست پێکرد و 15 مانگ بەردەوام بوو.

 

باکگراوند: دوای 15 مانگ جەنگ و کوژرانی 47 هەزار فەلەستینی و 1200 ئیسرائیلی، بەنێوەندگیریی میسر، ئەمریکا و قەتەر، حەماس و ئیسرائیل ڕێککەوتنی ئازادکردنی دیلەکان و ئاگربەستی غەززەیان واژۆ کرد.