لووتکەی دیداری هەرێمی کوردستان و ئیتاڵیا دەستپێدەکات

ئاڤا نیوز

 

حکومەتی هەرێمی کوردستان بەردەوامە لە فرەچەشنکردنی سەرچاوەکانی داهات و بەمەش دەرفەت دەخاتە بەردەم سەرمایەداران تاوەکو لە کۆربەند و دیدارەکانی وڵاتان سوودمەند بن.

 

چیرۆکی سەرەکی: ڕۆژی دووشەممە 10-2-2025، شاندێکی حکومەتی هەرێمی کوردستان بە سەرۆکایەتیی د. محەممەد شوکری، سەرۆکی دەستەی وەبەرهێنان و سەفین دزەیی، بەرپرسی فەرمانگەی پەیوەندییەکانی دەرەوەی هەرێمی کوردستان، لەگەڵ زیاتر لە 20 وەبەرهێنەر بۆ پتەوکردنی پەیوەندییە بازرگانی و ئابوورییەکان دەچنە ئیتاڵیا.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای ڕاگەیاند: لە قۆناغی یەکەمدا ئێمە سەردانی ئیتاڵیا دەکەین، لە داهاتوویەکی نزکیشدا بازرگان و وەبەر‌هێنەرانی ئیتاڵیا دێنە هەرێمی کوردستان، تاوەکو لە نزیکەوە دەرفەتەکانی وەبەرهێنان ببینن.

 

بابەتە ستراتیژییەکان: ئامانجی هەرێمی کوردستان پتەوکردنی پەیوەندییە بازرگانی و ئابوورییەکانە لەگەڵ ئیتاڵیا، لەو چوارچێوەیەشدا دیداری تایبەت لەگەڵ حکومەتی وڵاتەکە و کەرتی تایبەت ساز دەکرێت.

 

ئەوەی پێویستە بیزانیت: لە ماوەی ڕابردوو شاندێکی حکومەتی هەرێمی کوردستان و 11 وەبەرهێنەر بە سەرۆکایەتیی سەرۆکوەزیران مەسرور بارزانی، لە ماڵی کوردستان لە داڤۆس بەشدارییان لە کۆربەندی داڤۆس-سویسرا کرد، کە دەستپێشخەرانی کار، وەبەرهێنەر و گەورە ناوەندەکانی لێکۆڵینەوەی سیاسی و ئابووری لەسەر ئاستی جیهان بەشدار بوون.

 

بۆچی گرنگە: ئێستا زیاتر لە 50 پرۆژەی وەبەرهینانی بیانی بە سەرمایەی زیاتر لە 11 ملیار دۆلار هەرێمی کوردستان هەیە، دەرفەتەکانی حکومەت بۆ وەبەرهێنەران، هەرێمی کوردستان لەڕوووی بازرگانی و ئابوورییەوە زیاتر پێش دەخات.