شەشەم فێستیڤاڵی پایزەی کەلار کرایەوە

ئاڤا نیوز

ئەمڕۆ پێنج شەممە 20-11-2025، شەشەم فێستیڤاڵی پایزەی کەلار کرایەوە و وا بڕیارە ماوەی پێنج ڕۆژ بەردەوام بێت.

وێنە گەورەکە: بە ئامانجی گرنگیدان بە بەرووبوومی ناوخۆ و هەوڵدان بۆ بەبازاڕکردنی، ساڵانە فێستیڤاڵی تایبەت بەبازاڕکردنی بەرووبوومی ناوخۆ لە بەشێکی شارەکانی کوردستان دەکرێتەوە.

زانیاریی پەیامنێر: هونەر فارس، پەیامنێری ئاڤا لە گەرمیان گوتی: ئەمڕۆ پێنج شەممە 20-11-2025، شەشەم فێستیڤاڵی پایزەی کەلار کرایەوە و ماوەی پێنج ڕۆژ بەردەوام دەبێت، فێستیڤاڵەکە لە گۆڕەپانی شاری یاری کەلارە و 200 کۆشک و کەپر بۆ نمایشی بەرووبوومی ناوخۆ و کاری دەستی بەشداربووان دانراون.

زانیاریی زیاتر: لە فێستیڤاڵی پایزەی کەلار، بەشێوەی سەرەکی بەرووبوومی ناوخۆ نمایشکراوە وەک (هەنار، هەنجیری وشککراو، قەیسی وشککراو، تووی وشککراو، جۆرەکانی مرەبا، سرکەی هەنار، بنێشتەتاڵ و بنیشتی کوردی، گوێز، ژاژی، پەنیر، قەرەخەرمان، داندۆک، ترخێنە، کەشک، هەنگوین)، لە پاڵ ئەوانەش کاری دەستی و خواردنی کوردەواری و جلوبەرگی کوردی لە فێستیڤاڵەکە نمایش دەکرێن.

باکگراوند: ساڵی رابردوو بە بەهای زیاتر لە یەک ملیار و 900 ملیۆن دینار کڕین و فرۆشتن لە فێستیڤاڵەکە کراوە، بۆ ئەمساڵیش پێشبینی دەکرێت زیاتر لە 200 هەزار کەس سەردانی فێستیڤاڵەکە بکات.