کۆنسوڵی چین لە هەولێر: پەیوەندی چین و هەرێمی کوردستان بەردەوام لە بەهێزبووندایە

ئاڤا نیوز

کۆنسوڵی چین لە هەولێر پەیوەندی نێوان وڵاتەکەیی و هەرێمی کوردستان بە پەیوەندییەکی بەهێز و زۆر باش ناودەبات و دەڵێت ڕۆژ بە ڕۆژ ئەو پەیوەندییە بەرەوپێش دەچێت.

چیرۆکی سەرەکی: لیۆ جیۆن، کۆنسوڵی گشتیی چین لە هەولێر، ئەمڕۆ پێنجشەممە بەشداریکرد لە بەرنامەی نان و چای ئاڤا میدیا، ئاماژەی بە پەیوەندییەکانی نێوان هەرێمی کوردستان و وڵاتەکەی دا و گوتی پەیوەندییەکی زۆر باش و بەهێز لەنێوان هەرێمی کوردستان و وڵاتی چیندا هەیە و ڕۆژ لەدوای ڕۆژیش ئەو پەیوەندییانە بەرەوپێش دەچن، هاوکات گوتیشی کردنەوەی بەشی زمانی چینی لە زانکۆی سەڵاحەددین هەنگاوێکی گرنگ بوو بۆ ئاشناکردنی زمان و کولتووری چین بە قوتابیانی کوردستان.

لێدوانی فەرمی: لیۆ جیۆن، کۆنسوڵی گشتیی چین لە هەولێر، گوتی: 

- لەنێوان وڵاتی چین و هەرێمی کوردستاندا پەیوەندییەکی بەهێز و درێژخایەن هەیە، هاوکات پەیوەندیی نێوان چین و عێراقیش بۆ ساڵی 1938 دەگەڕێتەوە، 10 ساڵ لەمەوبەر حکومەتی چین بڕیاریدا کۆنسوڵخانە لە هەرێمی کوردستان و بە دیاریکراویش لە هەولێر بکاتەوە، پێمان وابووە ئەمە گرنگییەکی زۆری هەبووە و پەیوەندییەکانیش بەشێوەیەکی خێرا لە گەشەسەندندابوونە و ئەنجامی زۆر باشیان هەبووە، بەتایبەت لە بوارەکانی سەرمایەگوزاری، تەکنەلۆژی، ئابووری، کولتووری و مرۆیی و چەندین بواری دیکە.

-  کردنەوەی بەشی زمانی چینی لە زانکۆی سەڵاحەدین کە یەکەم بەشە لەسەر ئاستی عێراق دەکرێتەوە و چەندین قوتابیی کورد فێری زمانی چینیی و شارەزای کولتووری چینی دەبن هەنگاوێکی گرنگی حکومەتی هەرێمی کوردستان بوو، هاوکات سەنتەرێکی زمانی چینیش لە زانکۆی سلێمانی کراوەتەوە و چەندین بەرنامە و پرۆگراممان بۆ فێربوونی زمانی چینی و ئاشنابوون بە کولتوور و فەرهەنگی چینی پەرە پێداوە.