سوودانی بۆ هەرێمی کوردستان: بە دوو مەرج مووچەکانی ئەمساڵ دەنێرم

ئاڤا نیوز

 

محەممەد شیاع سوودانی، سەرۆکوەزیرانی عێراق لەبارەی مووچە پەیامێکی بۆ بەرپرسانی باڵای هەرێمی کوردستان ناردووە و جەختی لە جێبەجێکردنی دوو خاڵ وەک مەرجی ناردنی مووچەکانی ئەمساڵ  کردووەتەوە.

زانیاریی تایبەت: ئاڤا زانیویەتی سوودانی داوای کردووە حکومەتی هەرێمی کوردستان بە ڕێککەوتننی مووچە پابەندبێت، ئەگەر پابەند نەبن مووچە کێشەی تێدەکەوێت.

 

زانیاریی زیاتر:  سەرۆکوەزیرانی عێراق لە پەیامەکەیدا جەختیشی لەسەر دوو خاڵ کردووەتەوە: ناردنی سەدا 50ی داهاتی ناوخۆ،  لەگەڵ ناردنی لیستی مووچە و لیستی ئەو مووچەخۆرانەی لەڕێگەی هەژماری منەوە مووچە وەردەگرن.

بۆچوونی لایەنی بەرامبەر: لەبەرامبەردا سەرچاوەیەکی باڵا لە حکومەتی هەرێمی کوردستان بە ئاڤای ڕاگەیاند، وەک هەرێمی کوردستان پابەندن بە ڕێککەوتنەکە و ئەوەی لەسەریان بێت جێبەجێی ئەکەن، داواشی کرد حکومەتی عێراقیش بە ڕێککەوتنەکە پابەند بێت.

 

باکگراوند: ئەم بیانوو گرنتەی بەغدا بە هەرێمی کوردستان لەکاتیكدایە لە ماوەی ڕابردوودا شاندی هەرێمی کوردستان و عێراق لەبارەی مووچەی فەرمانبەرانی کوردستان ڕێککەوتن، کە تیایدا مووچەی 12 مانگی فەرمانبەران بۆ ساڵی 2025 زامن کرا، بەگوێرەی ڕێککەوتنەکە مانگانە بەغدا 950 بۆ یەک تریلیۆن دینار بۆ مووچە ڕەوانەی هەرێمی کوردستان دەکات لەبەرامبەردا هەرێمی کوردستان ئەرک و پابەندییەکانی خۆی بەگوێرەی ڕێککەوتنەکە جێبەجێ بکات.