ئیسرائیل بەرپرسێکی باڵای حەماس لە لوبنان دەکوژێت

ئاڤا نیوز

 

سوپای ئیسرائیل بەرپرسێکی باڵای سەربازیی بزووتنەوەی حەماس لە هێرشێکی ئاسمانیدا لە شاری سەیدا لە باشووری لوبنان دەکاتە ئامانج.

 

چیرۆکی سەرەکی: پێش نیوەڕۆی ڕۆژی دووشەممە 17-2-2025، فڕۆکەیەکی بێفڕۆکەوانی سوپای ئیسرائیل ئۆتۆمبیلێکی لە شاری سەیدا، لە باشووری لوبنان کردە ئامانج.

 

ڕاگەیێنراوی فەرمی: سوپای ئیسرائیل ڕایگەیاند: هێزە ئاسمانییەکانمان توانیان محەممەد شاهین، بەرپرسی بەشی ئۆپەراسیۆنە سەربازییەکانی بزووتنەوەی حەماس لە لوبنان بکوژن.

 

لەلایەکی دیکەوە: میدیای نزیک لە بزووتنەوەی حەماس کوژرانی محەممەد شاهین، سەرکردەی بزووتنەوەکەی لە هێرشەکەدا پشتڕاست کردەوە کە لەنێو ئۆتۆمبێلەکەیدا کراوەتە ئامانج.

 

- فڕۆکە ئیسرائیلییەکان ئۆتۆمبێلەکەی محەممەد شاهین-یان لە کەناری دەریا بە دووری چەند مەترێک لە خاڵێکی پشکنینی سوپای لوبنان کردە ئامانج.

 

ئەوەی پێویستە بیزانیت: ئەمە یەکەم هێرشەی سوپای ئیسرائیلە لە دوای ئاگربەستەکەی 23ی تشرینی دووەمی ساڵی ڕابردوو، دووەم هێرشە لە ماوەی 24 کاتژمێردا، دوای ئەوەی ئۆتۆمبێلێکی مەدەنی لە ناوچەی ئیقلیم توفاح لەسەر ڕێگای جەرجوع کرایە ئامانج.