ئاڤا بەدواداچوون بۆ فۆڕمی وەرگرتنی زەوی لە بەڕێوەبەرایەتی پۆلیسی گەرمیان دەکات

 

ئاڤا نیوز

دەنگۆی ئەوە بڵاوبووەتەوە کە گەندەڵی لە پڕکردنەوەی فۆڕمی پۆلیسی گەرمیان کراوە بۆ وەرگرتنی زەوی، گوایە ناوی کوڕی بەرپرسی تێ کراوە، دەستکاری زانیارییەکانی فۆڕمەکان کراوە، ئاڤاش لەسەر ئەمە بەدواداچوونی کردووە.

چیرۆکی سەرەکی: بەگوێرەی ئەو داواکارییە بێت کە لەلایەن ژمارەیەک پۆلیس بۆ ئاڤا نێردراوە، ئەفسەر و خزمی بەرپرس ناویان لە لیستی وەرگرتنی زەوی دەبینرێت کە ساڵی خزمەتیان تەواو نەکردووە، بەڵام  فۆرمیان بۆ پڕکراونەتەوە زانیاری ناڕاستیان بۆ ناردوون ناویشیان بۆ وەرگرتنی زەوی گەڕاوەتەوە، جا ناوی چەند کەسێک بڵاوبوونەتەوە، دوای بەدواداچوون دەرکەوت کە بەشێکیان بەڵێ لەو لیستە ناویان هەیە کە زەوی وەردەگرن.

لێدوانە فەرمییەکان:

٠ لوقمان سابیر، بەڕێوەبەری پۆلیسی گەرمیان، وتی ئەوە کاری لیژنەکەیە و من ئاگاداری نیم، چونکە دوای ئەوەی لیژنەی پۆلیسی گەرمیان پێداچوونەوە بە ناو و زانیارییەکان دەکات دواتر دەچێتە بەڕێوەبەرایەتی گشتیی، ئینجا بۆ وەزارەتەکان و بەچەند وردبینییەکدا دەڕوات.

٠ ڕائید ئارام سەرۆکی لیژنەی دابەشکردنی زەوی لە پۆلیسی گەرمیانیش دەڵێت، ڕاستە ناوی کوڕی بەڕێوەبەری پۆلیسی تێدایە، بەڵام هیچ کێشەیەک لە زانیارییەکانی نییە و بەهەقی خۆی ناوی گەڕاوەتەوە، ئەو دەنگۆیانەشی کە باس دەکرێن هیچ بنەمایەکی نییە، چونکە بەڵێننامە بە تاک بەتاکیان پڕکراوەتەوە کە هەر زانیارییەکی نادروست بدەن ڕووبەڕووی یاسا دەکرێنەوە.