یەکەم کۆبوونەوەی حەوت حیزبەکە بۆ پێکهێنانی هاوپەیمانێتی بێئەنجام بوو

ئاڤا نیوز

 

کۆبوونەوەی حەوت حیزبی کوردستان بۆ پێکهێنانی هاوپەیمانێتی لە هەڵبژاردنی داهاتووی پەرلەمانی کوردستان بێئەنجام بوو؛ بۆچوونی حیزبەکان لە یەکەوە دووربووە و لە دوایین کۆبوونەوەش هیچ قسەیەکی جددیان نەکردووە. 

 

وێنە گەورەکە: بە دەستپێشخەری حیزبی شیوعی و ئامادەبوونی شەش حیزبی دیکە، دوێنێ چوارشەممە کۆبوونەوەیەک بە ئامانجی پێکهێنانی هاوپەیمانێتییەک بۆ بەشداریکردن لە هەڵبژاردنی پەرلەمانی کوردستان کرا.

 

بۆچی گرنگە؟ لەبەرئەوەی دەنگی ئەو حیزبانە سنووردارە و دەنگدەری کەمیان هەیە، لە سیستەمی چوار بازنەیی زیانیان بەردەکەوێت، بۆیە دەیانەوێت بە پێکهێنانی هاوپەیمانێتی، بە لایەنی کەمەوە نوێنەرێکیان لە خولی داهاتووی پەرلەمانی کوردستان هەبێت. 

 

لێدوانی فەرمی: هیوا سەید سەلیم، ئەندامی مەکتەبی سیاسیی زەحمەتکێشان بە ئاڤا نیوزی گوت: “لە کۆبوونەوەکەدا تەنیا بیروڕاکان ئاڵوگۆڕ کران و بەشێکی بۆچوونەکانیش لە یەکەوە دوور بوون، هیچ قسەیەکی جددی لەسەر هاوپەیمانێتییەکە نەکراوە و ڕەنگە کۆبوونەوەی دیکەش بکەین".

 

زانیاریی زیاتر: حیزبی شیوعی، پارتی سۆسیال دیموکرات، پارتی پارێزگاران، پارتی کرێکاران و ڕەنجدەران، یەکێتیی نەتەوەیی دیموکرات، بزووتنەوەی دیموکرات و حیزبی زەحمەتکێشان ئەو حەوت حیزبەن کە دەیانەوێت هاوپەیمانێتییەکە پێکبهێنن.