سەرۆکوەزیرانی پێشووتری عێراق بە سەردانێکی لە ناکاو لە یەمەنە

ئاڤا نیوز

 

بە ئامانجی کەمکردنەوەی گرژییەکانی ناوچەکە، سەرۆکوەزیرانی پێشووتری عێراق لە سەنعای پایتەختی یەمەنە و نامەیەکی ئاڵوگۆڕی نێوان ئێران و ئەمریکای پێیە تاوەکو بیداتە بەرپرسانی سەنعا. 

 

وێنە گەورەکە: هاوتا لەگەڵ هەڵکشانی گرژییەکانی ناوچەکە پێکدادانی ئەمریکا و یەمەن، عادل عەبدولمەهدی سەرۆکوەزیرانی پێشووتری عێراق، بە سەردانێکی لە ناکاو لە سەنعای پایتەختی یەمەنە.

 

چیرۆکی سەرەکی: چەند سەرچاوەیەک ئاشکرای دەکەن، عادل عەبدولمەهدی لە چوارچێوەی هەوڵە نێودەوڵەتییەکان لە سەنعایە و هەوڵدەدات گرژییەکانی دەریای سوور کەمبکاتەوە، نامەیەکی ئاڵوگۆڕی لە نێوان ئەمریکا و ئێران پێیە و بە بەرپرسانی سەنعای دەدات. 

 

زانیاریی زیاتر: بە گوێرەی ڤیدیۆیەک لە تۆڕە کۆمەڵایەتییەکان لەلایەن عەبدولڕەحمان ئاهنۆمی فەرماندی حوسییەکان بڵاوکراوەتەوە، عادل عەبدولمەهدی لە سەنعایە، بەڵام میدیاکانی سەر بە حوسییەکان هیچ شتێکیان لەبارەی ئەو سەردانەوە بڵاونەکردووەتەوە. 

 

ئەوەی پێویستە بیزانیت: ئەو سەردانە ئەگەری دانووستانە ناڕەگەیندراوەکانی نێوان لایەنە نێودەوڵەتییەکان پشتڕاست دەکاتەوە، بە تایبەت پێشووتر ڕۆیتەرز بڵاویکردبووەوە، کە ئێران نامەیەکی زارەکی لە ڕێگەی نێردراوێکییەوە بۆ حوسییەکان ناردووە، کە پێشنیازی کەمکردنەوەی گرژییەکان لە دەریای سوور لە خۆدەگرێت.