پەرلەمانی عێراق دواخستنی هەڵبژاردنی سەرۆککۆمار ڕەتدەکاتەوە

ئاڤا نیوز

پەرلەمانی عێراق دەنگۆی دواخستنی دانیشتنەکەی ئەمڕۆی ڕەتکردەوە و جەخت دەکاتەوە کە کاتژمێر 11:00ـی پێشنیوەڕۆ پڕۆسەی هەڵبژاردنی سەرۆککۆمار دەستپێدەکات.

وێنە گەورەکە: هەر چەندە شەوی ڕابردوو سەرچاوەیەک لە چوارچێوەی هەماهەنگی ڕایگەیاند کە کۆبوونەوەی تایبەت بە هەڵبژاردنی سەرۆککۆمار دوا دەکەوێت بۆ ڕۆژی پێنجشەممە، بەڵام بەرەبەیانی ڕۆژی سێشەممە پەرلەمانی عێراق ئەو هەواڵەی ڕەت کردەوە.

لێدوانی فەرمی: فەرمانگەی ڕاگەیاندنی پەرلەمانی عێراق لە بەیاننامەیەکدا ڕایگەیاند: "کۆبوونەوەکە لە کاتی دیاریکراوی خۆیدا بەڕێوەدەچێت و هیچ بڕیارێکی فەرمیی بۆ گۆڕینی وادەکەی دەرنەچووە، بەو مانایەی دانیشتنەکە ئەمڕۆ کاتژمێر 11:00ـی پێشنیوەڕۆ ئەنجام دەدرێت."

زانیاریی زیاتر: سەرەڕای پێداگریی سەرۆکایەتیی پەرلەمان، بەڵام ئاڵۆزییە سیاسییەکان لە پشت پەردەوە مەترسیی پەکخستنی دانیشتنەکە زیاد دەکەن. بەشێک لە لایەنە سوننەکان وەک کاردانەوەیەک دژی کاندیدکردنی نوری مالیکی بۆ سەرۆکایەتیی وەزیران، هەڕەشەی بایکۆت دەکەن، هاوکات پارتی و یەکێتییش تاوەکو ئێستا نەگەیشتوونەتە ڕێککەوتن لەسەر کاندیدێکی هاوبەش و بە دوو کاندیدی جیاواز (فوئاد حوسێن و نزار ئامێدی) دەچنە ناو هۆڵەکەوە.

ئەوەی پێویستە بیزانیت: بۆ ئەوەی دانیشتنەکە شەرعییەتی هەبێت، دەبێت 220 پەرلەمانتار ئامادە بن، بەڵام زانیارییەکانی ئاڤا میدیا ئاماژە بەوە دەکەن کە ئەگەری تەواونەبوونی ئەم ڕێژە یاساییە یەکجار زۆرە، کە ئەمەش بە واتای دواخستنی کردەییی پڕۆسەکە دێت بۆ کاتێکی نادیار تاوەکو لایەنەکان دەگەنە سازشی سیاسیی.