مێرسیدێس 500 هەزار یۆرۆ دەدات بەو کارمەندانەی دەستلەکار دەکێشنەوە

ئاڤا نیوز 

 

ئەو کارمەندانەی بەشێوەی ئارەزوومەندانە دەستلەکار دەکێشنەوە و بڕی 500 هەزار یۆرۆ وەک قەرەبوو وەردەگرن.

 

چیرۆکی سەرەکی: کۆمپانیای مێرسیدێس بێنز لەدرێژەی پلانەکانی بۆ کەمکردنەوەی خەرجییەکانی کۆمپانیاکە لە ماوەی درێژخایەن داوا لەو کارمەندانە دەکات کە بەشێوەی خۆبەخشانە دەستلەکار دەکێشنەوە تاوەکو 500 هەزار یۆرۆ (802 ملیۆن و 604 هەزار دیناری عێراقی) وەک قەرەبوو دەدات بەو کارمەندانە.

 

پێدراوە ڕاستەکە: بەگوێرەی ڕاگەیەندراوێکی کۆمپانیای مێرسیدێس بێنز، بڕیارە کۆمپانیاکە تاوەکو ساڵی 2027 بڕی 5 ملیار یۆرۆ لە خەرجییەکانی کەم بکاتەوە.

 

ئەوەی پێشبینی دەکرێت: بەگوێرەی هەواڵێکی رۆژنامەی هاندێلسبالت، ئەگەر سەرپەرشتیاری بەشێک تەمەنی لە سەرووی 55 ساڵ بێت و ئەزموونی کاری 30 ساڵی هەبێت، وە مووچەی مانگانەی 9 هەزار یۆرۆ بێت ئەوا کۆمپانیاکە بڕی 500 هەزار یۆرۆ وەک قەرەبوو دەدات بەو کەسە. هەروەها، ئەگەر بەڕێوەبەرێکی تەمەن 45 ساڵ کە ئەزموونی کاری 20 ساڵ و مووچەی مانگانەی 7500 یۆرۆی هەبێت، پێشبینی دەکرێت کۆمپانیاکە زیاتر لە 300 هەزار یۆرۆ وەک قەرەبوو بدات بەو کارمەندانە ئەگەر بەشێوەیەکی ئارەزوومەندانە دەستلەکار بکێشنەوە.

 

باکگراوند: کۆمپانیای مێرسیدێس بەهۆی رێککەوتنی لەگەڵ کارمەندەکانی ناتوانێت تاوەکو ساڵی 2034 کارمەندەکانی بەشێوەی زۆرەملێ لەکار دەربکات، بۆیە ئەم پلانەی لە درێژەی هەوڵەکانی دایە بۆ پاراستنی مافی ئەو کارمەندانە و قەرەبووکردنەوەیان.