ئاسمانی عێراق بە تێپەڕبوونی 700 فڕۆکە لە ڕۆژێکدا ژمارەیەکی پێوانەیی تۆمار دەکات

ئاڤا نیوز

 

بۆیەکەمجار لە دوای جەنگی نێوان ئیسرائیل و ئێران، جوڵەی فڕۆکەوانی لە ئاسمانی عێراق بەخێرایی گەشەی کردووەتەوە و لە ڕۆژێکدا زیاتر لە 700 فڕۆکەی بازرگانیی و گەشتیاریی ئاسمانی وڵاتەکەیان بۆ گەشتەکانیان بەکارهێناوە.

 

وێنە گەورەکە: پێشتر فارس جەواری، پسپۆڕی فڕۆکەوانی عێراق بە ئاڤا میدیای ڕاگەیاندبوو، هەر فڕۆکەیەک کە ئاسمانی عێراق بەکاردەهێنێت 450 دۆلاری لێوەردەگیرێت، ڕاگرتنی گەشتەکانیش لە ماوەی جەنگی نێوان ئیسرائیل و ئێران دەتوانێت مانگانە 10 ملیۆن دۆلار زیان لە داهاتی عێراق لە بواری ئاسمانیدا بدات.

 

ڕاگەیێنراوی فەرمی: وەزارەتی گواستنەوەی عێراق بڵاویکردەوە، دوای گرژییە هەرێمییەکانی ئەم دواییە، جارێکی دیکە ئاسمانی عێراق بووەتەوە بە دەروازەیەک بۆ هاتووچۆی هێڵی نێودەوڵەتیی فڕۆکەوانیی و لە ڕۆژێکدا زیاتر لە 700 فڕۆکەی بازرگانیی و گەشتیاریی ئاسمانی وڵاتەکەیان بۆ گەشتەکانیان بەکارهێناوە.

 

ئەوەشی خستووەتەڕوو، وەزارەتی گواستنەوە لە پەرەپێدانی کەرتی ئاسمانیی و بەهێزکردنی بۆ یەکێک لە زیندووترین ڕێڕەوە نێودەوڵەتییەکان بەردەوام دەبێت، ئەوەش ڕەنگدانەوەی سەرکەوتنی عێراق دەبێت لە تێپەڕاندنی ئاستەنگییەکان و بەدەستهێنانەوەی متمانەی هێڵی نێودەوڵەتیی فڕۆکەوانیی.