شارەزایەکی ئابووری: پێویستە کارتی یەکگرتووی بانکی لە سزا نێودەوڵەتییەکان بپارێزرێت

ئاڤا نیوز

شارەزایەکی ئابووری دەڵێت، ئەو کارتە بانکییەی بانکی ناوەندی عێراق بڕیارە کۆتایی ئەمساڵ دەریبکات، پێویستە ڕێکاری وردی چاودێریی و  پابەندبوون بە ڕێنماییەکانی تێدا ڕەچاو بکرێت، بەپێچەوانەوە مەترسی ئەوەی لەسەرە ڕووبەڕووی سزای نێودەوڵەتی ببێتەوە.

وێنە گەورەکە: بەمەبەستی ئاڵوگۆڕی بازرگانی و پارەدانی ئەلیکترۆنی لەناوخۆی وڵاتدا، بانکی ناوەندیی عێراق بڕیاریداوە لەکۆتایی ئەمساڵدا کارتێکی یەکگرتووی بانکی دەربکات کە تەنیا بۆ مامەڵەکردن بە دینار بەکاردەهێنرێت.

لێدوانی فەرمی: زیاد هاشمی، شارەزای ئابووری لە عێراق لە ڕاگەیێنراوێکدا باسی لەوە كردووە، ئەمریکا دژایەتی کارتی یەکگرتووی بانکی ناکات کە بانکی ناوەندیی عێراق بڕیارە دروستیبکات، بەڵام کاتی پێدەدات و چاودێریی دەکات تا بزانێت ئەم سیستمە تازەیە چۆن بەکاردەهێنرێت و کێ هەوڵی بەکارهێنانی دەدات بۆ خۆدەربازکردن لە ڕێنماییەکان، بەوەش ئەگەر خراپ و هەڵە بەکاربهێنرێت مەترسی ئەوەی لەسەرە بکەوێتە ناو لیستی سزاکانی ئەمریکاوە.

ئەو شارەزایەش داوا دەکات بانکی ناوەندیی کاری ورد لە کارتی یەکگرتووی بانکیدا بکات و چاودێریی و پابەندبوون بە ڕێنماییەکان تیایدا بۆ بەرزترین ئاست بەرزبکاتەوە، تا خۆی نەخاتە ناو لیستی "چاودێریی و سزاکانی" ئەمریکا ئەویش بەهۆی بەکارهێنانی سیستمەکە بەشێوەی هەڵە و لەدەرەوەی ڕێنماییەکان.