بانکی ناوەندی دروستکردنی یەک کارتی یەکگرتووی بانکی بۆ پارەدانی ئەلیکترۆنی ڕادەگەیێنێت

ئاڤا نیوز

بەمەبەستی ئاڵوگۆڕ بازرگانی و پارەدانی ئەلیکترۆنی لەناوخۆی وڵاتدا، بانکی ناوەندی عێراق بڕیاریدا لەکۆتایی ئەمساڵدا کارتێکی یەکگرتووی بانکی دەربکات کە تەنیا بۆ مامەڵەکردن بە دینار بەکاردەهێنرێت.

وێنە گەورەکە: ئێستا لە عێراق جگە لە ڤیزاکارد  و ماستەرکارد، کە دوو کارتی بانکی نێودەوڵەتیین، ژمارەیەک کۆمپانیای دیکەش کارتی بانکییان هەیە، کارتە بانکییە تازەکەی بانکی ناوەندیش بەهۆی ئەوەی دامەزراوەیەکی فەرمی دەوڵەت دەریدەکات، چاوەڕێ دەکرێت لەناوخۆی عێراقدا پێشوازیی لێبکرێت، بەڵام کارتە نێودەوڵەتییەکان بۆ خەرجییەکانی دیکە بە دۆلار یان کڕینی پێداویستی لە ماڵپەڕە جیهانییەکان، هەر بە کارایی دەمێننەوە.

نوسراوی فەرمی: بەگوێرەی نوسراوێکی بانکی ناوەندی عێراق کە ڕۆژی 24ـی مانگی ڕابردوو بە واژۆی عەممار خەڵەف، جێگری پارێزگاری بانکی ناوەندی دەرچووە و ئاڕاستەی سەرجەم بانکەکان کراوە، ئاماژە بەوەکراوە، بانکی ناوەندی لەکۆتایی ئەمساڵدا بانکی ناوەندی پڕۆژەی ستراتیژی "کارتی ئەلیکترۆنی نیشتیمانی" ڕادەگەیێنێت، کارتەکەش بەگوێرەی پێوەرە نێودەوڵەتییەکان دروستدەکرێت و ئاسایش و توانای پڕۆسە داراییەکان لە وڵاتدا بەهێزتر دەکات، کۆی پڕۆژەکە و کارەکانیشی لەژێر سەرپەرشتی ڕاستەوخۆی بانکی ناوەندیدا دەبێت.

زانیاریی زیاتر: بەمەبەستی دروستکردنی ژێرخانێکی بانکی پێشکەوتووش بۆ سیستمی تازەی کارتە بانکییەکە، بانکی ناوەندی داوای لە هەموو بانکەکان کردووە هاوکاریی بن، لەگەڵ نوسراوەکەشدا بانکی ناوەندی چەند داواکارییەکی ئاڕاستەی بانکەکان کردووە و داوایکردووە وەڵامی پرسیارەکان و ئەو ژمارانەی داوایکردوون، بەدروستی و بەبەڵگەوە بدەنەوە.

بە تەنیشت ئەم بابەتەوە: بانکی ناوەندی ئەمڕۆش لە ڕوونکردنەوەیەکدا ئاماژەی بەداوە، پڕۆژەی کارتی نیشتیمانی یەکگرتوو بۆ پارەدانی ئەلیکترۆنیی، پڕۆژەیەکە تەنیا بۆ ناوخۆی عێراق و بۆ مامەڵەکردن بە دینار بەکاردەهێنرێت، پڕۆژەکە کارتەکانی دیکەی وەک ڤیزاکارد و ماستەرکارد هەڵناوەشێنێتەوە یان سنوورداریان ناکات، ڕەتیشیدەکاتەوە هیچ پلانێک بۆ هەڵوەشاندنەوەی ئەو کارتانە یان قەدەغەی مامەڵەکردن بە دۆلار لە دەرەوەی عێراق هەبێت.