سەرۆکوەزیرانی کوردستان لەگەڵ وەزیری دەرەوەی ئیمارات تاوتوێی گۆڕانکارییەکانی ناوچەکە دەکەن

ئاڤا نیوز

لە دوێنێوە سەرۆکوەزیرانی کوردستان لە ئیماراتە، دوای کۆبوونەوەی لەگەڵ سەرۆکی ئیمارات. لەگەڵ وەزیری دەرەوەی ئەو وڵاتە کۆبووەوە و باسیان لە گۆڕانکارییەکانی ناوچەکە کردووە.

چیرۆکی سەرەکی: لە کابینەی نۆیەمدا پەیوەندییەکانی نێوان هەرێمی کوردستان و ئیمارات گەیشتووەتە قۆناغێکی هەرە پێشکەوتوو. لەماوەی ڕابردوو ئیمارات نێردەی تایبەتی ئابووری خۆی ناردە هەرێمی کوردستان.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاوی کردەوە، ئێوارەی ئەمڕۆ هەینی مەسرور بارزانی، سەرۆکوەزیرانی کوردستان لەشاری ئەبوزەبی، لەگەڵ شێخ عەبدوڵڵا بن زاید، وەزیری دەرەوەی ئیمارات کۆبووەوە. لە کۆبوونەوەکە دووپاتی پەرەپێدانی پەیوەندییەکانی نێوان ئیمارات و هەرێمی کوردستان کراوە، هاوکات دوایین دۆخی گشتیی عێراق و پێشهات و گۆڕانکارییەکانی ناوچەکە بەشێکی دیکەی گفتوگۆکان بووە.

ئەوەی پێویستە بیزانیت: ڕۆژی پێنجشەممە، مەسرور بارزانی، سەرۆکوەزیرانی کوردستان گەیشتە ئیمارات، تا ئێستا جگە لە دانیشتنی لەگەڵ وەزیری دەرەوە لەگەڵ هەریەکە لە شێخ محەممەد بن زاید ئال نەهیان، سەرۆکی ئیمارات و شێخ سەیف بن زاید ئال نەهیان، جێگری سەرۆکوەزیران و وەزیری ناوخۆی ئیمارات کۆبووەتەوە.