پیاوێکی ڕووسی حەوت مانگە شەوانە لە پارکەکانی هەولێر دەخەوێت

ئاڤا نیوز

پیاوێکی بە تەمەنی ڕووسی حەوت مانگە لە شاری هەولێر شەوانە لە پارکەکان دەخەوێت، تەنیا ڕووسی دەزانێت، وەڵامی پرسیاری کەسیش ناداتەوە، تەنانەت لە کامێراش ڕادەکات و ئامادە نییە قسە بکات.

چیرۆکی سەرەکی: پیاوێکی ڕووسی تەمەن 70 ساڵ ماوەیەکە ڕۆژانە لە هەولێر دەبینرێت بێ ماڵ و حاڵە و لە پارکەکان دەخەوێت. ڕۆژانە دەچێتە مزگەوتی جەودەت ئەسعەد لە گەڕەکی 32ـی پارک، بەردەوامیش کۆڵەپشتێکی پێیە.

لێدوانی فەرمی: جەمیل خدر، بانگبێژی مزگەوتی جەودەت ئەسعەد بە ئاڤای وت، پیاوە ڕووسییەکە ناوی نایل عەبدوڵڵایە، حەوت مانگە هاتووەتە هەولێر. لە ڕووسیا لە خێزانەکەی جیابووەتەوە، تەنیا کچێکی هەیە، حەوت مانگ پێش ئێستا ویستوویەتی بچێتە سعوودیە بۆ عومرە، بەڵام گرفتێک لە پاسپۆرتەکەی هەیە و نەیتوانیوە بگاتە سعودییە. ئیتر نازانرێت لە ڕووسیا چۆن گەشتی کردووە و بۆ گەیشتووەتە هەولێر.

کاریگەریی ئاڤا: دوای 20 خولەک لە بڵاوکردنەوەی هەواڵەکە لە ئاڤا، پارێزگای هەولێر پەیوەندی بە ئاڤاوە کرد و بڕیاری داوە بۆ خانەی بەساڵاچووان بگوازرێتەوە، دواتریش ڕادەستی کونسوڵخانەی ڕووسیا لە هەولێر دەکرێتەوە.