ئەمینداری حیزبوڵڵا: چەکدانان قبوڵ ناکەین

ئاڤا نیوز

ئەمینداری گشتیی حیزبوڵڵای لوبنان دووپاتی دەکاتەوە، حیزبوڵڵا چەک دانانێت و ئامادەن بەرگریی بکەن.

وێنە گەورەکە: ئەمریکا و ئیسرائیل بە تووندی گوشار لە حکومەتی لوبنان دەکەن بۆ جێبەجێکردنی بڕیارنامەی 1701 و داماڵینی چەک لە حیزبوڵڵا لە باشووری ڕووباری لیتانی.

ڕاگەیێنراوی فەرمی: نەعیم قاسم، ئەمینداری گشتیی حیزبوڵڵای لوبنان ڕایگەیاند: هێرشەکانی سوپای ئیسرائیل لە پێناو چەکی ناو حیزبەکەدا نییە، بەڵکو بۆ داگیرکردنی وردە وردەی لوبنان و دامەزراندنی ئیسرائیلی گەورەیە، ئاماژەی بەوەشکرد؛ ئەوان دەیانەوێت چەکەکانمان دابماڵن، پارەمان ببڕن، ڕێگری لە خزمەتگوزارییەکان بکەن، قوتابخانە و نەخۆشخانەکان دابخەن، ڕێگری لە ئاوەدانکردنەوە و بەخشینەکان بکەن، ماڵەکان بڕوخێنن و دەیانەوێت بوونی ئێمە نەهێڵن".

ئەمینداری حیزبوڵڵا دووپاتی کردەوە، بەرگری لە خۆمان و خێزان و وڵاتەکەمان دەکەین، ئامادەین قوربانی بدەین، تەسلیم نابین و هێزمان لەوە زیاتریش دەبێت.

ئەمەش بزانە: لە مانگی 11ـی ساڵی ڕابردووەوە، ئیسرائیل و حیزبوڵڵا گەیشتنە ڕێککەوتن بۆ ئاگربەست و کشانەوەی ئیسرائیل لە باشووری لوبنان، بەڵام ئیسرائیل لە پێنج خاڵی سەرەکی ماوەتەوە و بەگوێرەی حکومەتی لوبنان، لەو کاتەوە ئیسرائیل هەزاران هێرشی کردووەتە سەر ئەو وڵاتە، چەندین سەرکردەی دیاری حیزبوڵڵا و دەیان هاووڵاتیی مەدەنی کوشتووە.