توێژینەوەیەک: بەکارهێنانی مۆبایل بەر لە تەمەنی 12 ساڵی مەترسیدارە

ئاڤا نیوز

توێژینەوەیەکی نوێی ئەمەریکی هۆشداریی دەدات لەوەی پێدانی مۆبایلە زیرەکەکان بە منداڵان پێش تەمەنی 12 ساڵی، ڕەنگە دەرگایەک بێت بۆ کێشە تەندروستی و دەروونییەکان، لەوانەش خەمۆکی و تێکچوونی خەو.

چیرۆکی سەرەکی: گۆڤاری پزیشکیی منداڵانی ئەمەریکا توێژینەوەیەکی بڵاوکردووەتەوە کە پشتی بەستووە بە شیڪردنەوەی داتای زیاتر لە دە هەزار منداڵ لە چوارچێوەی پرۆژەی "گەشەی زانستی مێشکی منداڵان".

زانیاریی زیاتر: ئەنجامەکان دەریانخستووە ئەو منداڵانەی لە تەمەنێکی بچووکدا مۆبایلیان هەبووە، بە بەراورد بەو منداڵانەی دوای تەمەنی دوانزە ساڵی مۆبایلیان وەرگرتووە، زیاتر ڕووبەڕووی کێشە دەروونییەکان، کەمخەوی و تەنانەت زیادبوونی کێش بوونەتەوە.

لێدوان فەرمی: دکتۆر ڕان بارزیلای، پزیشکی دەروونی منداڵان لە نەخۆشخانەی فیلادلفیا دەڵێت: "پێدانی مۆبایل بە منداڵ دەبێت وەک بڕیارێکی پزیشکی مامەڵەی لەگەڵ بکرێت کە کاریگەری راستەوخۆی لەسەر تەندروستییان هەیە، پێویستە دایکان و باوکان زۆر بە وردی بیر لەم هەنگاوە بکەنەوە."

لە لایەکی دیکەوە: دکتۆر جەیسۆن ناگاتا لە زانکۆی کالیفۆرنیا ئاماژەی بەوە کردووە: کە مۆبایل کاریگەری نەرێنی لەسەر چۆنییەتی خەوی منداڵان هەیە و بەپێی ئامارەکان 63%ی منداڵانی تەمەن 11 بۆ 12 ساڵ ئامێرە ئەلیکترۆنییەکان دەبەنە ژووری نووستنەکەیان و 17%یان شەوانە بەهۆی دەنگی ئامێرەکان (Notifications) لە خەو هەڵدەستن.

زانیاریی زیاتر: شارەزایان و توێژەران لەسەر ڕاسپاردەیەکی گشتی کۆکن: "هەرچەندە پێدانی مۆبایل بە منداڵ بۆ دوای تەمەنی 12 ساڵی دوا بخرێت، مەترسییە تەندروستی و دەروونییەکان کەمتر دەبنەوە." چونکە نەبوونی بەڵگەی یەکلاکەرەوە بە واتای پشتگوێخستنی مەترسییەکان نایەت.