دییپفەیک دەبێتە مەترسییەکی نوێ بۆ سەر گەنجان و سیاسییەکان

ئاڤا نیوز

 

تا دێت ئامرازەکانی زیرەکی دەستکرد زیاتر دەبن و زۆر بواری جیاوازیشی گرتووەتەوە، ئێستا دوای پەرەسەندنی زیاتری زیرەکی دەستکرد وەکو هەڕەشەیەک بۆ سەر ژیانی گەنجان و سیاسییەکان سەیر دەکرێت، بەهۆی ئەوەی دەتوانرێت وێنە و ڤیدیۆی نەشیاوی پێ دروست بکرێت. 

 

وێنە گەورەکە: ئێستا زیرەکی دەستکرد لە چەندین بواری جیاواز بەکاردەهێنرێت، لەوانەش: دروستکردنی ڤیدیۆ و وێنە، بواری پزیشکی و توێژینەوەی زانستی، ئەمەش وایکردووە ئاسانکارییەکی زۆر بۆ بەکارهێنەرانی بێنێتە ئاراوە و بۆ بەشێکی دیکەش بووەتە سەرچاوەی کێشەی گەورە. 

 

زانیاریی زیاتر: بەگوێرەی توێژینەوەیەک کە لەسەر گەنجانی بەریتانیا ئەنجامدراوە، گەنجانی ئەو وڵاتە ترسیان بەرامبەر بەکارهێنانی توڵەکانی زیرەکی دەستکرد زیادی کردووە، بەتایبەت لەبوارەکانی دروستکردنەوەی وێنەی ساختە و وێنەی نەشیاو، تاوەکو ئێستا نزیکە یەک ملیۆن وێنەی گەنجان بەبێ جلوبەرگ بڵاوبووەتەوە و ئەمەش تووشی گرفتی گەورەی دەروونی کردوون. 

 

لەلایەکی دیکەوە: لاورا مەكلووەر، ئەندام پەرلەمانی بەریتانیا، لەماوەی ڕابردوودا لە پەرلەمانی ئەو وڵاتەوە ڕایگەیاند، وێنەی منیان بە زیرەکی دەستکرد دروستکردووەتەوە و هیچ جلوبەرگێکم لەبەردا نییە، دەبێت هەموو سیاسییەکان ئەوە بزانن Deepfake مەترسییەکی ئاشکرایە کە لە ڕێگەی زیرەکی دەستکردەوە دەکرێت.