مەسرور بارزانی پەیامێکی هاوخەمی ئاراستەی حکومەتی کۆریای باشوور دەکات

ئاڤا نیوز

سەرۆک وەزیرانی هەرێمی کوردستان سەبارەت بە قوربانییانی ئاگری دارستانەکانی کۆریای باشوور پەیامێکی هاوخەمی ئاراستەی حکومەت و گەلی ئەو وڵاتە دەکات.

چیرۆکی سەرەکی: ماوەی چەند ڕۆژێکە، ئاگرێکی گەورە لە دارستانەکانی شارۆچکەی ئویسۆنگ لە باشووری رۆژهەڵاتی کۆریای باشوور کەوتووەتەوە و بەهۆیەوە نزیکەی 20 کەس گیانیان لەدەستداوە و دەیان کەسی دیکەش برینداربوونە. ئاگرەکە هێشتا کۆنترۆڵ نەکراوە و هەزاران کەس لە هێزەکانی بەرگریی شارستانی و سوپای کۆریای باشوور لە هەوڵی کوژاندنەوەیدان.

ڕاگەیێندراوی فەرمی: سەرۆک وەزیران مەسرور بارزانی هەرێمی کوردستان لە تۆڕی کۆمەڵایەتیی ئێکس، پۆستێکی لەبارەی ئەو ئاگرەی چەند ڕۆژێکە، لە کۆریای باشوور کەوتوونەتەوە، بڵاوکردەوە دەڵێت: "زۆر دڵتەنگم بەو ئاگرانەی لە کۆریای باشوور کەوتوونەتەوە. هزر و بیرکردنەوەم لای قوربانییان و خێزانەکانیانە. هیوای ڕزگاربوون و چاکبوونەوەیەکی خێرا بۆ زیانلێکەوتووان دەخوازم."

سەرۆک وەزیران دووپاتیشی کردووەتەوە "حکومەتی هەرێمی کوردستان لەم کاتە سەختەدا لەگەڵ گەل و حکومەتی کۆریای باشوور دەوەستێتەوە".