ئەمشەو کارەبای 24 کاتژمێری دەگاتە شەش گەڕەکی دیکەی هەولێر

ئاڤا نیوز

ئەمشەو کارەبای 24 کاتژمێری پڕۆژەی ڕووناکی لە گەڕەکەکانی تەیراوە، مستەوفی، کورانی عەنکاوە، عەنکاوە، سەڵاحەددین و منارە کارا دەکرێت و هاونیشتمانیان لەو پڕۆژە ستراتیژیەی حکومەت سوودمەند دەبن.

وێنە گەورەکە: پڕۆژەی رووناکی کە مەبەست لێی دابینکردنی کارەبای 24 کاتژمێرییە لە ڕۆژی 2024-10-17، لەلایەن سەرۆکوەزیران مەسرور بارزانی لە گەڕەکی شادی هەولێر ڕاگەیێنرا و بڕیارە لەماوەی دوو ساڵدا کارەبای بەردەوام و 24 کاتژمێری بۆ سەرتاسەری هەرێمی کوردستان دابین بکرێت، بەمەش هەزاران مۆلیدەی گەڕەکەکان دەکوژێنەوە.

زانیاریی زیاتر: دوای کاراکردنی کارەبای بەردەوام لەو شەش گەڕەکەی هەولێر، ژمارەی ئەو گەڕەکانەی لە چوارچێوەی پڕۆژەی ڕووناکی کارەبای 24 کاتژمێریان بۆ دابینکراوە دەبێتە 26 گەڕەک و بە کۆی گشتی 346 هەزار هاونیشتمانی لەم خزمەتگوزارییە سوودمەند دەبن.

بۆچی گرنگە: ئەم پڕۆژەیە ڕۆژ دوای ڕۆژ لە فراوانبوونە، تا ئێستا لە سەرانسەری هەرێمی کوردستان 415 هەزار هاونیشتمانی کارەبای 24 کاتژمێریان بۆ دابین کراوە و بەو هۆیەوە 600 مۆلیدەی تایبەت وەستێنراون و لەسەرانسەری هەرێمی کوردستان لە 35 گەڕەک جێبەجێکراوە.

لە لایەکی دیکەوە: دوێنێ پێنجشەممە بۆ یەکەمجار پڕۆژەی ڕووناکی گەیشتە دهۆک و کارەبای 24 کاتژمێری بۆ هەریەکە لە گەڕەکەکانی بەرۆشکێ و سەرهەڵدان دابینکرا و لە 13ـی ئەم مانگە ئەو پڕۆژەیە گەیشتە شاری سلێمانیش.