حەکیم: بەرەی مقاوەمە پابەندی ئاگربەستن

ئاڤا نیوز

 

سەرۆکی ڕەوتی حیکمە ستایشی هێزە چەکدارەکانی بەرەی مقاوەمەی  عێراق دەکات، هاوکات پێکهێنانی هەرێمی دیکەی هاوشێوەی هەرێمی کوردستان بە "نەگونجاو" ناو دەبات.

 

وێنە گەورەکە: بەگوێرەی زانیاریی میدیاکانی عێراق، زیاتر لە 10 هەزار چەکدار لە دەرەوەی دەسەڵاتی فەرماندەیی هێزە چەکدارەکانی عێراق کار دەکەن بەناوی "بەرەی مقاوەمەی ئیسلامی لە عێراق" و پێداگرن لەسەر مانەوە لە دەرەوەی دامەزراوە فەرمییەکانی حکومەت.

 

لێدوانی فەرمی: عەممار حەکیم، سەرۆکی ڕەوتی حیکمە لەمیانی بەشداریکردنی لە پانێڵێکدا ڕایگەیاند: گرووپە چەکدارەکانی عێراق پابەندن بە کەمکردنەوەی ئاستی کێشەکان لەگەڵ ئەمەریکا و نایانەوێت لەو بارەوە حکومەتی فیدراڵ شەرمەزار بکەن. 

 

لەلایەکی دیکە: سەبارەت بە پێکهێنانی هەرێمی نوێ لە عێراق، حەکیم ئەم پرسەی لەم کاتەدا بە ناگونجاو زانی، وێڕای ئەوەی دەستوور ڕێگای بە دامەزراندنی هەرێمی هاوشێوەی هەرێمی کوردستان داوە.

 

ئەمەش بزانە: سوننەکانی عێراق ماوەی چەند ساڵێکە باسی دامەزراندنی هەرێمێکی هاوشێوەی هەرێمی کوردستان لە پارێزگاکانی ئەنبار و سەڵاحەدین و نەینەوا دەکەن، ئەمەش جگە لە چەند لایەنێکی شیعە کە داوای هەرێمی بەسڕە و میسان و فوڕاتی ناوەڕاست دەکەن.