قایمقامیەتی سلێمانی هەفتەیەک مۆڵەت دەداتە دوکاندارانی ناو بازاڕ

ئاڤا نیوز

لیژنەکانی قایمقامیەتی سلێمانی یەک هەفتەیان مۆڵەت داوە بەو دوکاندارانەی شەوان کەلوپەلەکانیان لەبەردەم دوکان جێ دەهێڵن و مەترسی ئاگر کەوتنەوەیان لێ دەکرێت.

وێنە گەورەکە: چەند ساڵێکە لیژنەکانی قایمقامیەتی سلێمانی لە وەرزی هاویندا ڕێکارەکانی خۆپارێزی لە ئاگر کەوتنەوە جێبەجێ دەکەن، ئەمساڵ لەم هەفتەیەوە ڕێکارەکان دەستیان پێکردووە.

لێدوانی فەرمی: گۆران قادر، سەرۆکی لیژنە هاوبەشەکانی قایمقامیەتی سلێمانی بە ئاڤا میدیای وت، ڕۆژی شەممەی هەفتەی داهاتوو 2025-04-12، دوا مۆڵەتە بۆ ئەو دوکاندارانەی شەوان کاڵاکانی بەردەم دوکانەکانیان نابەنە ژوورەوە. بە پێچەوانەوە ڕێکاری تووندیان لەگەڵ دەگیرێتەبەر. ئەم ڕێکارە بۆ دوورخستنەوەی بازاڕەکانە لە ڕووداوی ئاگر کەوتنەوە، بە تایبەت بازاڕە داخراوەکان.

بەوتەی گۆران قادر، بەشێکی زۆری دوکاندارەکان پابەندی بڕیارەکەن، بەڵام هەندێکیان تا ئێستاش پابەند نین، جگە لەمە پێویستە دوکانداران سەرجەم ڕێکارەکانی خۆپارێزی و مەرجەکانی بەرگری شارستانی جێبەجێ بکەن کە پێشتر پێیان دراوە.

باکگراوند: سەرەتای ئەم هەفتەیە، ئاگرێکی گەورە لە بازاڕی دارە سووتاوەکەی سلێمانی کەوتەوە و بە هۆیەوە زیاتر لە 150 دوکان سووتان.